Ministri i Drejtësisë Ylli Manjani ka shprehur edhe njëherë angazhimin e plotë të tij për të zbatuar rekomandimet e raportit të KE-së, që i shërbejnë rrugës së vendit për hapjen e negociatave të anëtarësimit në unionin evropian. Ai deklaroi se tashmë ka ardhur koha e punës.
“Plotësimi i të gjitha rekomandimeve të këtij raporti do të bëjë të mundur që të marr ftesën për të çelur negociatat për anëtarësim në pranverë. Është një axhendë konkrete, s’ka më llafe, deklarata boshe, është koha e punës. Ky raport është bibla ime dhe e kolegëve të mi në përbërje të qeverisë. Kryetema e këtij raporti lidhet drejt për drejtë me reformën në drejtësi”, tha ministri Manjani.
Më tej Manjani deklaroi se janë gati një sërë masash konkrete që do të merren nga dikasteri që ai drejton, me fokus nismat për luftën kundër korrupsionit. Sipas tij, kjo betejë do të jetë e vazhdueshme.
