Ministri i Drejtësisë Ylli Manjani ka urdhëruar pezullimin e çertifikatës së ushtrimit të veprimtarisë ndaj Përmbaruesit Gjyqësor Privat Martin Tusha. Shkak për këtë veprim është bërë dyshimi se është kryer vepra penale e vjedhjes duke shpërdoruar detyrën.
Ndaj shtetasit Martin Tusha, Gjykata e Tiranës ka vendosur caktimin e masës së sigurimit “arrest me burg” në mungesë.
Përsa më sipër, Ministri i Drejtësisë, Ylli Manjani urdhëroi pezullimin e çertifikatës së ushtrimit të veprimtarisë përmbarimore Nr 44, datë 10/09/2010 të Përmbaruesit Gjyqësor Privat Martin Tusha, për aq kohë sa janë në fuqi veprimet hetimore të procedimit penal në ngarkim të tij.
Duke marrë shkas nga ky rast, Ministri i Drejtësisë, Ylli Manjani tërheq vëmendjen ndaj të gjithë shërbimit përmbarimor privat që të jenë korrekt në ushtrimin e funksionit të tyre, veçanërisht në rastet e titujve ekzekutiv, duke përdorur llogari të posaçme për zbatimin e tyre.
