I ftuar në Tonight Ilva Tare, anëtari i komisionit të posaçëm të reformës në drjtësi, Ulsi Manja vuri alarmin se segmente të caktuara të politikës dhe të sistemit të drejtësisë po bëjnë çmos për ta zvarritur zbatimin e reformës në drejtësi.
“Mbi drejtësinë është Zoti. Ne e kemi konceptuar që një gjyqësor i pavarur do të jetë vettingu më i mirë për politikanët e korruptuar. Ne themi që të ngrejmë drejtësinë për të pastruar politikën, e kundërta nuk mund të ndodhë. Sot për fat të keq ka segmente të caktuara në sistem dhe në politikë po i vënë shpatullat njëri-tjetrit për ta zvarritur në kohë procesin e reformës në drejtësi. Ne e kemi thelbësore këtë reformë” – tha zoti Manja
Manja tha gjithashtu se prokurori shkeli frymën e kushtetutës për shortin e Këshillit të emërimeve në drejtësi pasi ligji për statusin e gjyqtarëve dhe prokurorëve dhe kushtetuta janë të qarta në këtë pikë.
Kushtetuta është shumë e qartë. Ligji për statusin e gjyqatrëve dhe prokurorëve është shumë i qartë. Ligji për organet e qeverisjes gjyqësore ku parashikohen kushtet dhe kriteret ligjore për anëtarët e KED, ka një gërmë e cila kërkon domosdoshmërinë e mbarimit të shkollës së magjistraturës, përdor termin magjistratë dhe duhet të ketë mbaruar shkollën e magjistraturës. Nuk shtrohet problemi se ka ndeshje me kushtetutën të këtij ligji sepse kushtetuta dhe ligji për statusin është shumë i qartë. Tani prokurori i përgjithshëm nuk duhet të kishte përjashtuar nga gara pjesën tjetër të prokurorëve të prokurorisë së përgjithshme. Edhe në nivelin e prokurorive të apelit janë çuar vetëm 2 kandidatura që kishin mbaruar shkollën e magjistraturës. Edhe këto magjistratë që kanë ardhur në nivelin e prokurorive të apelit, ju ftoj t’i hulumtoni se sa kohë përpara se të hidhet shorti për anëtarët e KED nga shkalla e parë për në prokurorinë e apelit.
