Sipas tij, është vetë Komisioni Europian që vendos çfarë raportesh do të ketë me ONM që do të bashkëpunojë me institucionet shqiptare për të bërë vetingun e gjyqtarëve dhe prokurorëve.
“Ata kanë pasur nevojë të qartësohen. Bordi i ONM ka një mision tjetër ndërsa vëzhguesit kanë mision tjetër. Ky bord do të udhëhiqet nga KE.
Tani se si e organizon punën KE në raport me ONM është çështje e tyre. Puna e vëzhguesve është përgjegjësi e autoriteteve kushtetues për kriteret e saj”, theksoi deputeti socialist, duke shtuar se së fundmi janë qartësuar çështjet.
Deputeti Manja u shpreh edhe për protestën e opozitës dhe efektin që do të ketë në ngritjen e dy komisioneve të vetingut, Komisionit të Pavarur të Kualifikimeve dhe Kolegjit të Apelimit. Ai tha se protesta apo mos qenia e deputetëve demokratë në Kuvend, bllokon vetingun.
“Vetingu është larg dhe afër. Është larg për shkak të bojkotit nga ana e Partisë Demokratike dhe do të ishte shumë afër nëse Parlamenti do të kishte treguar vullnetin e duhur politik nëse do të kishte venë në zbatim reformës.
Brenda këtij muaji duhet të zgjidheshin drejtuesit e komisioneve”, tha deputeti i PS në një intervistë televizive. Sipas Manjës, brenda javës së parë të muajit mars kandidaturat për Vetingun duhet të ishin në Kuvend dhe të niste procesi i ngritjes së komisionit Ad Hoc që do të përbëhet nga 3 deputetë të mazhorancës dhe 3 të opozitës. Në kushtet kur PD ka bojkotuar Kuvendin, ngritja e këtij komisioni është në pikëpyetje.
ma.me
