Qindra qytetarë nga Kosova, Shqipëria dhe diaspora e veshën Hagën kuqezi për të mbështetur ish-krerët e UÇK-së në këtë fazë vendimtare të gjyqit.
Ambasadori i Shqipërisë në Holandë, Artur Kuko, tha për mikrofonin e RTSH se fuqia e manifestimeve shprehu me zë të lartë se liria ka emër.
“Liria foli me zë të lartë, të fortë dhe të kthjellët, siç mund ta keni parë gjatë manifestimit të ditëve të fundit. Më lejoni të shpreh ndjenjën time besimplotë që drejtësia do të vendoset më shpejt sesa më vonë. Shpresoj shumë që brenda 6–7 muajve të ardhshëm të ketë një përgjigje që do të na gëzojë të gjithëve. Jam pjesë e atij zëri të lartë, të fortë dhe të kthjellët,” u shpreh ambasadori Kuko.
Diplomati ndër të tjera foli për marrëdhëniet dypalëshe Shqipëri–Holandë dhe për integrimin.
“Holanda mbetet një vend që vijon të përkrahë rrugëtimin europian të Shqipërisë sipas një parimi të mirëvendosur tashmë, që është strikt, i drejtë dhe i angazhuar. Është një rritje e nivelit të përkrahjes së opinionit publik holandez për Shqipërinë,” tha ambasadori Kuko.
Kritikave të kryeministrit Rama për më tepër vëmendje në diplomacinë ekonomike, ambasadori iu përgjigj: “Ne vijojmë përpjekjet tona për të gjeneruar, sa më shumë që të jetë e mundur, interesin e sektorit ekonomik holandez për të qenë i pranishëm në Shqipëri. Hapësira ekziston për shumë herë më tepër sesa ky shkëmbim në nivelet tregtare.“
Ambasadori Kuko vuri gjithashtu në dukje se niveli i mbështetjes mes holandezëve për integrimin europian të Shqipërisë është në rritje.
