Nga Eduard Zaloshnja
Në fillim të presidenceës së tij të dytë, Donald Trump deklaroi se po vinte në Shtëpinë e Bardhë me një mandat “plebishitar” elektoral. Por rezultatet zyrtare të zgjedhjeve tregojnë se ai nuk arriti dot të merrte as gjysmën e votës popullore (mori vetëm 49.8% të votave në shkallë kombëtare). Ai nuk fitoi dot në 19 shtete, ku banon më shumë se gjysma e popullsisë së SHBA-së.
Fitorja e Trump-it u përcaktua në tre shtete kyçe nga vetëm 115 mijë vota (sa ç’është popullsia e Bashkisë Elbasan). Nëse në ato tre shtete (Pennsylvania, Michigan, Wisconsin), 115 mijë votues do ta kishin ndërruar votën nga Trump tek Kamala, kjo e fundit do të kishte shkuar në Shtëpinë e Bardhë…
Le të krahasojmë këtë mandat “plebishitar” elektoral të Trump-it me mandatet e dy gjigantëve elektoralë të 100 vjetëve të fundit.
Franklin D. Roosevelt e siguroi presidencën e tij të dytë më 1936 me 3/5 e votës popullore (60.8% të votave në shkallë kombëtare). Vetëm në 2 shtete fare të vogla nuk arriti ai të fitonte – Vermont dhe Maine (ku senatorët e partisë rivale kishin bazë të fortë përkrahje lokale). Mbi 98% e popullsisë amerikane banonte atëherë në shtetet e fituara nga Franklin D. Roosevelt! Se çfarë bëri ai me atë mandat vërtet plebishitar elektoral e ka regjistruar historia tashmë…
Ronald Reagan e siguroi presidencën e tij të dytë më 1984 me pothuaj 3/5 e votës popullore (58.8% të votave në shkallë kombëtare). Ai nuk arriti të fitonte vetëm në Minesota – shteti ku rivali i tij kishte bazën e vet politike. Mbi 98% e popullsisë amerikane banonte atëherë në shtetet e fituara nga Ronald Reagan! Se çfarë bëri ai me atë mandat vërtet plebishitar elektoral e ka regjistruar historia tashmë…
Se çfarë do të bëjë Trump-i me mandatin e tij “plebishitar” elektoral mbetet historia ta gjykojë…
