Këshilli për Rregulloren, Mandatet dhe Imunitetin u mblodh këtë të premte për të vijuar diskutimet në lidhje me mandatin e deputetit socialist.
Si PD-ja dhe PS-ja dolën me dy raporte të ndryshme, por që rekomandojnë që projektvendimi i Këshillit për dërgimin e mocionit në Gjykatën Kushtetuese për konstatimin e papajtueshmërisë të mbarimit të mandatit të deputetit Vullnet Sinaj të kalojë në seancë plenare për votim.
“Në këto kushte shumica në këtë këshill rekomandon që t’i kalojë në seancë plenare për votim projektvendimi për dërgimin e mocionit në Gjykatën Kushtetuese për konstatimin e papajtueshmërisë të mbarimit të mandatit të deputetit Vullnet Sinaj”, u shpreh Klotilda Bushka nga PS.
Sipas Bardhit, konkluzionet e të dyja raporteve në Këshill për herë të parë janë të njëjta.
“Unë po flas për raportin e Këshillit që ndodh për herë të parë që ne biem në një mendje, edhe mazhoranca edhe opozita, që mocioni është kushtetues dhe përmbush të gjitha kriteret”, tha Bardhi.
Për këtë arsye, pas diskutimeve mes palëve, kryetarja e parlamentit Elisa Spiropali vendosi që raportet të votohen në seancën e parë plenare të sesionit të ri.
Deputetët e opozitës akuzojnë Sinajn se ka përfituar nëpërmjet nëntë kompanive të tij të ardhura nga buxheti i shtetit në shumën e rreth tre milionë e gjashtëqind e tetëdhjetë mijë lekëve, në kundërshtim me kushtetutën. Ndërkohë Sinaj ka mohuar çdo akuzë.
