Manchester City ka shmangur ankthin e dy viteve të fundit, kur mbetej jashtë çerekfinaleve në Champions League për shkak të përballjeve me Barcelonën. Si fitues i grupit eliminator, City pati një short më të lehtë dhe e shfrytëzoi më së miri, teksa fitoi 3-1 në Kiev me Dinamon.
Aguero dhe Silva shënuan dy gola në pjesën e parë, ndërsa në të dytën vendasit shkurtuan diferencën. Pavarësisht përpjekjeve të ukrainasve, anglezët ishin skuadra më e mirë dhe shënuan edhe golin e tretë që praktikisht e çon në tetëshe skuadrën e Pellegrinit.
Në Holandë, rrjeta të paprekura midis PSV Eindhoven dhe Atletico Madrid. Vendasit mbetën me dhjetë lojtarë në minutën e 68-të, por spanjollët nuk arritën ta shfrytëzonin, duke lënë gjithçka hapur për ndeshjen e kthimit, më 15 mars.