“Sot pas 4 vitesh kemi një Tiranë që gëlon nga aktivitetet, nga zhurmat e fëmijëve që sot kanë kënde lojërash. Gjithashtu kemi gjitha ato projekte të cilat janë pro zhvillimit të një qyteti modern. Ne nuk mund të themi që intelektualët nuk mbështesin zhvillimin apo bashkitë për t’u zhvilluar. Unë mendoj që intelektualët dhe gjithsecili e sheh ndryshimin”, u shpreh ministrja e Shëndetësisë dhe Mbrojtjes Sociale, Ogerta Manastirliu gjatë një interviste televizive.
Manastirliu tha se, “të gjithë së bashku më 30 qershor do votojnë për ndryshimin, do votojnë për kryetarët e bashkive që dinë t’i çojnë punët përpara. Votimet do jenë më standarde se këto standarde do të garantohen nga Komisioni Qendror i Zgjedhjeve dhe nga gjithë strukturat që po merren me procesin e zgjedhjeve”.
“Zgjedhjet me standarde janë normale të ndodhin në një vend demokratik dhe ne nuk kemi frikë që do prishen standarde apo do ndodhë diçka. Gjithë institucionet ligjzbatuese do jenë për të mbrojtur standardet nëse do ketë ndonjë rast sporadik që del nga rruga e ligjit”, – u shpreh ministrja Manastirliu.
Ministrja vijoi se, “zhdekretimi i Presidentit është një akt nul, i pavlefshëm gjë që e tha dhe Kolegji Zgjedhor i Apelimit pak ditë më parë me votimin 5 me 0. Presidenti ka tejkaluar kompetencat e veta që i lejon ligji. Kushtetuta është e qartë dhe e saktë mbi datën e zgjedhjeve. Komisioni i ligjeve sot ka miratuar raportin për vijimin e procedurave për ngritjen e një komisioni hetimor për të vijuar procedurën e shkarkimit të Presidentit për aktin e paligjshëm”.
“Dialogu ka qenë fjala kyçe në çdo moment të vendimmarrjeve të opozitës jashtë parlamentare. Ftesa për dialog ka qenë e hapur, 7 letra i ka dërguar kryeministri Rama demokratëve për dialog. Ne nuk mund të japim pushtet pa zgjedhje”, – përfundoi ministrja e Shëndetësisë dhe Mbrojtjes Sociale, Ogerta Manastirliu.
Manastirliu sqaroi edhe vendimin e Kongresit të Autoriteteve Lokale për tërheqjen e vëzhguesve nga monitorimi i zgjedhjeve, si një vendim që nuk do të ndikojë as mbi cilësinë dhe as mbi ligjshmërinë e zgjedhjeve.
“Kongresi Autoriteteve Lokale nuk është shprehur as mbi datën e zgjedhjeve dhe as mbi ligjshmërinë e tyre. I vetmi institucion që ka ekskluzivitetin e zgjedhjeve është OSBE/ODIHR. Madje dhe sot është shprehur se do të vazhdojnë monitorimin, me vëzhgues të shtuar”, – tha Manastirliu.(ATA)/l.m
