Skuadra e re e Partisë Socialiste të Tiranës u prezantua sot nga Kryeministri dhe Kryetari i Partisë Socialiste Edi Rama dhe drejtueset politike të Qarkut Tiranë, Ogerta Manastirliu dhe Elisa Spiropali.
Manastirliu tha se ka qenë një periudhë sfiduese me takime të shumta për të ardhur të përfaqësia që do të drejtonte garën e Tiranës.
“Kemi qenë në terren, në takime, diskutime, marrje opinionesh dhe sugjerimesh nga komuniteti, nga strukturat e Partisë Socialiste. Kemi diskutuar me profesionistë, pedagogë të universiteteve tona për të marrë opinionet për kandidatët tanë dhe për të vjelë nga ata sugjerime për atë që do të ishte përfaqësia që do të drejtonte garën në qarkun e Tiranës. Qarku i Tiranës është zemra e Shqipërisë, e gjithë energjia e madhe e njerëzve të mrekullueshëm që meritojnë të kenë përfaqësuesit dinjitozë. Kombinimi i eksperiencës dhe energjisë së të rinjve do të bëjë që ne të arrijmë atë objektiv ambicioz që i kemi vendosur vetes”, tha drejtuesja politike e qarkut të Tiranës, Ogerta Manastirliu.
Në vijim të prezantimit të kandidatëve për zgjedhjet e 11 majit në qarkun e Tiranës, drejtuesja politike e Partisë Socialiste për këtë qark, Ogerta Manastirliu, ka shprehur besimin e saj të plotë në ekipin që do të përfaqësojë PS-në në këtë garë elektorale. Ajo theksoi rëndësinë e fitores në kryeqytet, duke e cilësuar Tiranën si forcën shtytëse të Partisë Socialiste.
“Kjo është punë në skuadër, mision i të tërëve, i strukturave tona, kandidatëve, një misionin historik që na bashkon, një mision patriotik për ta çuar Shqipërinë dhe për ta bërë anëtare të Bashkimit Europian. Unë jam shumë entuziaste për ekipin tonë të Tiranës. Jam e bindur që do t’ia dalim të bëjmë një fitore historike dhe Tirana të jetë ashtu siç ka qenë gjithmonë, lokomotiva e Partisë Socialiste.”
