Ministrja e Shëndetësisë dhe Mbrojtjes Sociale, Ogerta Manastirliu vizitoi Qendrën e Zhvillimit në Durrës, ku shpërndau karrige me rrota për personat me aftësi të kufizuar. Lajmi bëhet i ditur nga dikasteri në fjalë, përmes një njoftimi për mediat.
“Ministria e Shëndetësisë dhe Mbrojtjes Sociale po mbështet një shërbim shumë të rëndësishëm që i mundëson pavarësi lëvizje personave më aftësi të kufizuar, siç është shërbimi i karrigeve me rrota falas. Vetëm gjatë këtij viti, 850 persona me aftësi të kufizuar janë pajisur me karrige me rrota falas, që nga fëmijë të vegjël e deri te të moshuarit” – është shprehur Manastirliu sipas njoftimit.
Gjatë vizitës në Qendrën e Zhvilimit në Durrës, Manastirliu vuri theksin te ngritja e qendrave të reja për personat me aftësi ndryshe.
“Ministria e Shëndetësisë dhe Mbrojtjes Sociale është e angazhuar jo vetëm sot, në Ditën Ndërkombëtare për Personat me Aftësi të Kufizuar, por çdo ditë të vitit, të garantojë shërbime socio-shëndetësore sa më pranë komunitetit, me ngritjen e 5 qendrave të reja për fëmijët me aftësi të kufizuar, por edhe të fuqizojë personat me aftësi ndryshe, për t’ju siguruar barazi dhe gjithëpërfshirje” – citohet në njoftim Manastirliu.
Sipas Ministrisë së Shëndetësisë, gjatë vizitës, ministrja Manastirliu bëri edhe një apel për punësimin e personave me aftësi ndryshe.
/A.Rada
