Unitedi është çerekfinalisti i fundit në FA Cup.
Manchester Unitedi i Ole Gunnar Solskjaer është kualifikuar në çerekfinale të FA Cup, duke e eliminuar Chelsean midis “Stamford Bridge”, shkruan Gazeta Express.
“Djajtë e Kuq” ishin dukshëm më të mirë se “Blutë e Londrës” dhe siguruan një vend në çerekfinale falë dy golave në pjesën e parë, sfidë që u mbyll me atë rezultat, 2-0.
Golin e parë të ndeshjes për “Djajtë e Kuq” e shënoi mesfushori, Ander Herrera, në minutën e 31’, derisa për 2-0 realizoi një gol të bukur me kokë, mesfushori tjetër, Paul Pogba, në minutën e 45’, në fund të pjesës së parë.
Në pjesën e dytë, Chelsea i Sarrit u mundua me të gjitha forcat t’i ndryshojë gjërat, por nuk ia arriti qëllimit.
Kjo humbje në shtëpi ia vështirëson edhe më shumë punët Sarrit, që është me një këmbë jashtë Chelseat.
