Malltezi merret i pandehur si vjehrri: Kanë fshehur dokumentet, e kanë ulur shumë veten…

SPAK mori këtë të mërkurë të pandehur Jamarbër Malltezin. Dhëndri i ish-kryeministrit Sali Berisha ishte në SPAK ku iu komunikua akuzat në lidhje me privatizimin e ish-kompleksit “Partizani”, të cilat para gazetarëve i cilësoi si gënjeshtra.

Ai akuzoi kryeministrin Rama se ka manipuluar këtë institucion duke e përdorur politikisht, ndërsa lidhur me akuzat për aferën e privatizimit të ish-kompleksit “Partizani”, theksoi se nuk janë të bazuara në fakte.

“Për fat të keq kanë gënjyer e janë për t’u keqardhur kur pushteti i bën të gënjejnë aq trashë”, tha ai duke nënvizuar se plani mban firmën e kryeministrit Edi Rama.”Njerëz që gënjejnë e fshehin dokumente duhen thjesht të mëshirohen se sa shumë e kanë ulur veten”, shtoi ai.

Me planin e ndjekur për ish-kompleksit “Partizani”, Malltezi pretendoi se Rama ka manipuluar çështjen duke ngritur akuza të pabaza ndaj tij dhe ish-kryeministrit Berisha. Nga ana tjetër, ai theksoi se plani për ndryshimin e destinacionit të këtij kompleksi është firmosur nga vetë Edi Rama.

/a.r