Dogana e Malit të Zi njoftoi më 25 shtator se ka ndaluar në Portin e Tivarit një kontejner me mish të ngrirë gjedhi me afat të skaduar, të destinuar për kompaninë “Apetit SHPK” nga Kosova.
Ky kontejner, sipas njoftimit, përmbante mbi 24 tonë peshë të përgjithshme të mishit, të shpërndarë në rreth 1.300 pako.
Sipas autoriteteve malazeze afati i përdorimit të mishit kishte skaduar më 14 maj të këtij viti.
Në një reagim për rastin, Agjencia e Ushqimit dhe Veterinarisë (AUV) tha se kompania Apetit është duke iu nënshtruar masave të rrepta të kontrollit qysh nga 18 shtatori.
“Pavarësisht kësaj, nga data 18 shtator AUV menjëherë ka iniciuar kontroll të detajuar. Biznesi është duke u mbajtur nën mbikëqyrje të vazhdueshme nga data e nisjes se inspektimeve. Informacionet e reja të pranuara sot, do të përfshihen dhe plotësojnë kontrolli e plotë ne vijimësi”, tha ajo.
AUV tha se ka urdhëruar gjurmueshmëri të plotë të produkteve të importuara nga Apetit, përfshirë verifikimin e dokumenteve të origjinës dhe importit, sasive të importuara e të shpërndara dhe destinacioneve të produkteve.
Agjencia shtoi se më herët ka marrë edhe mostra për analiza, ndërsa çdo ngarkesë e operatorit po i nënshtrohet kontrolleve shtesë në kufi. Në të njëjtën kohë, inspektorati po kontrollon sasitë e produkteve në depo dhe ato që janë vendosur në treg.
Radio Evropa e Lirë ka kontaktuar kompaninë “Apetiti SHPK” për të marrë koment lidhur me këtë çështje, por deri në publikimin e këtij artikulli nuk ka marrë përgjigje.
Ky është rasti i dytë i njoftuar nga autoritetet doganore malazeze, pas ndalimit paraprak të tre kontejnerëve me mish gjedhi, me peshë bruto prej rreth 77.8 tonësh.
Në rastin e mëparshëm, sipas Doganës malazeze, “etiketat origjinale që tregonin afatin e skaduar ishin hequr dhe zëvendësuar me etiketa që shënonin një afat tjetër përdorimi”.
Sipas Doganës, mishi nga këta tre kontejnerë do të asgjësohet pas përfundimit të procedurave ligjore. Vetëm në shtatë muajt e parë të këtij viti, mbi 50 milionë euro mish gjedhi dhe pule janë importuar në Kosovë nga Brazili.
Ndërkaq nga 3 shtatori, Bashkimi Evropian i ka vënë kufizime importit të një pjesë e eksporteve me origjinë shtazore nga Brazili. Arsyeja lidhet me rregullat e BE-së për përdorimin e antimikrobikëve te kafshët që përfundojnë në zinxhirin ushqimor./REL/
