Ministri i Financave, Petrit Malaj, deklaroi se qeveria ka zgjeruar skemën e garancisë sovrane për ndërmarrjet e vogla dhe të mesme në kuadër të nismës “Dyfisho sipërmarrjen tënde”, duke rritur fondin dhe lehtësuar kushtet e financimit për bizneset.
Gjatë prezantimit të nismës, Malaj tha se pas mbështetjes së dhënë për fermerët, këtë vit garancia sovrane është shtrirë edhe për sipërmarrjet e vogla dhe të mesme.
“Përgjatë këtij viti qeveria vendosi ta shtrinte fushën e garancisë sovrane edhe për ndërmarrjet e vogla dhe të mesme. U bë edhe rishikimi i parametrave të kësaj garancie, nga 3 miliardë lekë në 5 miliardë lekë,” tha ministri.
Sipas tij, janë përmirësuar edhe kushtet e financimit, duke zgjatur afatin e shlyerjes së kredive dhe duke ulur barrën financiare për sipërmarrjet.
“U zgjat afati i shlyerjes së kredive nga 5 në 10 vjet. U vendos që normat e interesit të mbahen në nivelin 2-3 për qind dhe mbulimi nga garancia sovrane të jetë mbi 70 për qind. Gjithashtu është zgjeruar edhe shuma që mund të përfitojë çdo aplikant,” u shpreh Malaj.
Ministri theksoi se ndërmarrjet e vogla dhe të mesme kanë një rol kyç në ekonominë shqiptare.
“Ndërmarrjet e vogla dhe të mesme punësojnë mbi 82 për qind të fuqisë punëtore dhe mbulojnë 75 për qind të investimeve në sektorin privat. Duke pasur parasysh këto nevoja, ndërmorëm këto masa,” tha ai.
Malaj nënvizoi se qeveria do të vijojë mbështetjen për këtë kategori biznesesh.
“Qeveria mbetet e angazhuar për të mbështetur sipërmarrjet e vogla dhe të mesme. Do të duhet të rrisim investimet në teknologji dhe në zhvillimin e kapaciteteve të fuqisë punëtore, me synimin për të rritur cilësinë dhe konkurrueshmërinë,” deklaroi ministri.
Duke folur për planet e këtij viti, ai bëri të ditur se qeveria ka parashikuar instrumente të reja financimi.
“Për vitin 2026 qeveria ka parashikuar një linjë kredie prej 250 milionë eurosh të vënë në dispozicion nga Banka e Shqipërisë. Kemi edhe garancinë sovrane prej 50 milionë eurosh, e cila do të shikohet me rritje,” tha Malaj.
Ai shtoi se në mbështetje të sipërmarrjes, për këtë vit është parashikuar edhe një fond prej 800 milionë lekësh në buxhetin e Ministrisë së Ekonomisë dhe Inovacionit.
