Brigitte Bardot mendon se është një “mrekulli” që nuk vdiq pas disa përpjekjeve për t’i marrë jetën vetes.
91-vjeçarja bën rrëfimin tronditës në një dokumentar të publikuar së fundmi, “Bardot.”
Sipas The Sunday Times, ajo tregon se është përballur me depresionin përgjatë gjithë jetës, edhe në pikun e famës dhe u përpoq të vetëvritej.
“Isha duke u vetëvrarë dhe u shpëtova nga një mrekulli”, shprehet ajo, por nuk e përcakton cila ishte kjo mrekulli.
Aktorja shton se lufton ende me depresionin. “Zgjohem çdo mëngjes dhe jam e trishtuar.”
Ylli i kinemasë ka gjetur ngushëllim te kafshët dhe aktivizmi për to.
“S’më intereson nëse njerëzit më kujtojnë. Ajo që do të doja vërtet është që njerëzit të kujtojnë respektin që u detyrohemi kafshëve. Sa më shumë përparoj në jetë, aq më shumë u trembem njerëzve. Jam më shumë kafshë sesa njeri.”
Dokumentari për jetën e saj vjen vetëm pak kohë pasi Bardot u shtrua në spital për arsye të panjohura dhe iu nënshtrua një ndërhyrjeje kirurgjikale. Në korrik të vitit 2023 ajo u dërgua në spital me probleme në frymëmarrjeje.
Bardot ishte një yll ndërkombëtar në vitet ’50-60. Ajo u tërhoq nga skena në 1973 pak para se të mbushte 40 vjeçe sepse e përçmonte famën, të cilën e quante “makth.”
Nga ai moment, i është përkushtuar mbrojtjes së kafshëve, por është kthyer edhe në një personazh kontraversial për shkak të pikëpamjeve ekstreme politike. Ajo është dënuar edhe për komente islamofobike.
