Shkrimtari Maks Velo në një intervistë për gazetaren Eni Vasili është shprehur se godina e Teatrit nuk duhet shembur dhe se evidentohen katër problem.
Maks Velo: Për mua, nuk duhet shembur. Aty ka katër probleme. Problemi i parë është i tokës, problemi i dytë është i teatrit, problemi i tretë është trashëgimia dhe i katërti projekti. Shpesh, mundohen t’i ngatërrojnë këto të katërta, ndonëse ato janë probleme veç e veç. Për mua, ajo tokë i duhej dhuruar Teatrit, për faktin se për kaq vjet, aty është zhvilluar një aktivitet i madh, janë krijuar institucione. Unë kam qenë në teatër që në vitin 1950. Kam parë edhe “Prefektin” me Behije Çelën, etj.. Kam bërë disa skenografi, kur drejtor ka qenë Xhemal Broja, i cili më ka ftuar. Aty janë themeluar të gjitha institucionet e kulturës. Aty është themeluar Teatri i Kukullave, Ansambli i Ushtrisë, Orkestra Filarmonike, në 1953 kam qenë aty kur Krantja dirigjoi Filarmoninë e Tiranës, pastaj kam parë baletet “Shatërvani i Bahçisarajit”, “Rusalkën”, etj.. Ka një manipulim, një goditje të keqe ndaj ndërtesës, me justifikimin: vajza ime është 2 vjeç dhe nuk e di se çfarë është bërë aty dhe ta shembim. Me këtë logjikë, edhe unë nuk kam qenë në kohën e Ismail Qemalit dhe le ta shembim shtëpinë e Vlorës, që, për mua, s’ka asnjë rëndësi dhe nuk kam asnjë lidhje me të, ose me godinën ku u mbajt Kongresi i Lushnjës. Unë kam lindur në vitin 1935, ç’lidhje kam unë me të. Vlerat vijnë nga vjetërsia. Francezët shitën një shishe vere të 1774-ës, 103 mijë euro. Kantina e ka mbajtur që në 1774-n. Kjo e bën vlerë dhe jo aftësia që të bësh një verë të re. Trashëgimia është pikërisht transmetimi, grumbullimi dhe ruajtja e vlerave, sepse ne kaq kemi. Unë e di mirë dhe më dhembi që këta (aktorët) ishin shumë keq kur shkuan në Londër te “Shekspiri”, por ne këtë nivel kemi. Nuk është se ne në fusha të tjera jemi shkëlqyeshëm. Është gabim i rëndë. Trashëgimia jonë aty është.
Velo i ka kërkuar kryeministrit Edi Rama dhe kryebashkiakut Erion Veliaj që të heqin dorë nga prishja e Teatrit Kombëtar.
Eni Vasili: Artistët kërkojnë tërheqjen e qeverisë nga projketiligji dhe pastaj rinegocimin e grupeve të interest me artistët, qytetarët, arkitektët etj. Ju mendoni që mund të ketë realisht tërheqje nga qeveria apo është një çështje e mbyllur ky projekt.
Maks Velo: Unë do të dëshiroja të kishte një tërheqje. N.q.s do kishte një tërheqje, do ta riste shumë emrin e Ramës edhe të kryebashkiakut. E kundërta do ta dëmtonte. Dmth të gjithë bëjmë gabime. Të gjithë mund të kemi një moment debulese, po n.q.s qytetarët shohin që ky njeri e kuptoi këtë gjënë e vlerësojmë shumë. Unë do të dëshiroja të ishte kështu.
a.ç
