Kryeministri i zgjedhur i Hungarisë, Péter Magyar, ka premtuar se do të pezullojë shërbimet informative të mediave shtetërore, duke i cilësuar ato si një “makinë propagande”, sapo qeveria e tij të marrë detyrën, që pritet rreth mesit të muajit maj.
Magyar, i cili fitoi bindshëm zgjedhjet e së dielës duke i dhënë fund 16 viteve në pushtet të Viktor Orbán, bëri të ditura planet e tij gjatë dy intervistave, për radion dhe televizionin publik të mërkurën.
Sipas tij, këto ishin paraqitjet e para në mediat shtetërore pas 18 muajsh, në kontrast të fortë me daljet e rregullta të Orbán. Gjatë intervistave, Magyar akuzoi mediat publike për përhapje frike dhe gënjeshtrash, duke i krahasuar ato me propagandën e Koresë së Veriut dhe të Gjermanisë naziste.
“Çdo hungarez meriton një media publike që transmeton të vërtetën”, deklaroi ai për radion shtetërore.
Ai shtoi se qeveria e tij do të miratojë një ligj të ri për shtypin dhe do të krijojë një autoritet të ri mediatik, me synimin për t’i kthyer mediat shtetërore në funksionin e tyre të vërtetë publik.
Nga ana tjetër, autoritetet e mediave shtetërore hodhën poshtë pretendimet e Magyar se ai ishte përjashtuar gjatë fushatës, duke deklaruar se i kishin bërë disa ftesa atij dhe partisë së tij.
Organizata Reporters Without Borders ka ngritur vazhdimisht shqetësime për gjendjen e medias në Hungari, ku rreth 80% e mediave kontrollohen nga aleatë të partisë Fidesz të Orbán, ndërsa mediat shtetërore janë përdorur shpesh si zëdhënëse të qeverisë.
Pas intervistave, Magyar reagoi në rrjetet sociale duke deklaruar “Sapo kemi parë ditët e fundit të një makinerie propagande. Pas formimit të qeverisë së Tisza, do të pezullojmë shërbimet informative të mediave ‘publike’ derisa të rikthehet karakteri i tyre i vërtetë publik.”
Kryeministri i zgjedhur përsëriti gjithashtu thirrjen për dorëheqjen e presidentit të Hungarisë, Tamás Sulyok, i konsideruar mbështetës i Orbán. Ai tha se presidenti nuk përfaqëson më unitetin kombëtar dhe nuk është në gjendje të garantojë respektimin e ligjit, duke shtuar se Sulyok ka rënë dakord t’i “shqyrtojë” argumentet e tij.
Zhvillimet e fundit japin një pasqyrë të sfidave që e presin Magyar, ndërsa ai synon të çmontojë modelin e “demokracisë joliberale” të ndërtuar nga Orbán, gjatë së cilës institucionet shtetërore, mediat dhe sistemi gjyqësor janë mbushur me besnikë politikë.
Ndërkohë, presidenti amerikan Donald Trump, një nga aleatët më të fortë ndërkombëtarë të Orbán, reagoi me tone të moderuara ndaj rezultatit të zgjedhjeve. Ai u shpreh se beson se lideri i ri “do të bëjë një punë të mirë”.
Trump dhe rrethi i tij kanë parë prej kohësh Orbán si një model politik, veçanërisht për qasjen ndaj pushtetit shtetëror dhe retorikës kundër kundërshtarëve politikë.
Gjatë fushatës zgjedhore në Hungari, Trump kishte bërë disa thirrje publike për mbështetjen e Orbán, ndërsa edhe zëvendëspresidenti amerikan JD Vance vizitoi Budapestin për të treguar mbështetje ndaj tij.
Megjithatë, pas humbjes, Vance e përshkroi Orbán si një “partner të mirë” dhe shprehu keqardhje për rezultatin, duke theksuar se administrata amerikane do të bashkëpunojë me qeverinë e re hungareze.
