Konventa e Grave Socialiste u mbajt sot në një ditë të veçantë, që përkon me Ditën Ndërkombëtare të Gruas.
Në këtë aktivitet, nuk mund të mungonin edhe disa burra të partisë Socialiste që ishin plot batuta.
Në fjalën e rastit, deputeti Pandeli Majko u shpreh i bindur se me reformën zgjedhore, 50 % e kandidaturave të çdo partie politike do të jenë gra. Por pas kësaj, Majko me humor u bëri një kërkesë grave socialiste. “Kjo punë mori fund Gramos i dashur. Por nuk duam që të na sillni në politike sherrin e grave,” tha ai.
Majko nuk la pa ngacmuar edhe kryeministrin Rama, duke iu referuar deklaratës së para pak ditëve, ku Rama tha: ‘Jam feminist se jam socialist’. “Ai ngatërron ca gjëra duke deklaruar se ishte feminist se ishte socialist. Në brezin tim dhe tëndin feminizmi ka një konotacion tjetër. Pyetja është çfarë ishe para se të bëheshe anëtar i PS”.
Por në këtë ambjent plot batuta dhe komplimenta për gratë nuk mund të mungonte as përgjigjia e Ramës.
“Pandi ngriti problemin e feminizmit dhe nuk ishte origjinale ajo që thashë unë. Ishim në një takim me gratë dhe unë thashë që nuk jam feminist por mendoj që 1,2,3 gjëra, dhe pasi mbarova fjalën ishte një zonjë e shoqërisë civile e më tha: Me ato që the ti, më feminist se kaq s’mund të jesh, kështu që rikonsideroje e më pas më pëlqeu një fjalë e kryeministrit spanjoll, Zapateros, që tha unë jam feminist se jam socialist dhe kush është socialist s’mund të mos jetë feminist. Këtë e provon edhe Pandi që edhe pse se thotë është aq feminist sa ju do habiteshit, dhe ka kaq shumë gra e vajza te njësia 5 që e dëshmojnë këtë gjë dhe dëshmojnë, feminist si Zapatero, apo që Pandi foli për ne të vjetrit që dikur ishim të rinj, por sigurisht duke qenë dhe shumë i lidhur me NATO është feminist me vetëpërmbajte të jashtëzakonshme e që unë ia kam shumë zili”- tha Rama.
