Presidenti francez, Emannuel Macron siguroi sonte në një fjalim para kombit se do ta përmbushte deri në fund mandatin e tij.
”Do ta përmbush deri në fund mandatin tim”, deklaroi Macron duke pranuar edhe përgjegjësinë e tij për gjendjen e krijuar.
Presidenti pranoi se vendimi i tij për të shpërndarë Asamblenë Kombëtare në qershor, i cili e zhyti Francën në një krizë politike, nuk u kuptua duke marrë përgjegjësinë e tij, në një fjalim drejtuar francezëve, një ditë pas mocionit të mosbesimit ndaj qeverisë së Michel Barnier.
”Për këtë vendim, shumë më kanë fajësuar mua dhe unë e di, shumë vazhdojnë të më fajësojnë mua. Është një fakt dhe është përgjegjësia ime”, tha presidenti në një fjalim televiziv, ndërsa akuzoi opozitën e ekstremit të majtë dhe të djathtë ekstreme se ”janë bashkuar në një front antirepublikan”.
”Ekstremi i djathtë dhe ekstremi i majtë është bashkuar në një front antirepublikan”, deklaroi ai.
Presidenti francez tha gjithashtu se do të emëronte ”në ditët në vijim një kryeministër për një qeveri të interesit të përgjithshëm”.
Franca, ekonomia e dytë më e madhe e eurozonës, po përballet me një deficit buxhetor në rritje që po shkatërron aksionet dhe obligacionet franceze dhe po rrit kostot e huamarrjes.
Zyra e Macron është vetë e paprekur nga votimi i mosbesimit, por e ardhmja e tij ka të ngjarë të vihet në pikëpyetje, pasi ai emëroi Barnier dhe partia e tij është e përfshirë në qeveri.
Opozita ka të ngjarë të përpiqet të bëjë presion ndaj Macron për të thirrur një zgjedhje të parakohshme presidenciale, aktualisht të planifikuara në 2027.
Por, presidenti ka deklaruar vazhdimisht se dëshiron të qëndrojë kreu i shtetit deri në fund të mandatit të tij.
Pas rënies së qeverisë së Gjermanisë muajin e kaluar, dy nga lojtarët kryesorë të Evropës tani mund të jenë në një bllokim politik për shkak të krizave të brendshme.
