Kryeministri Edi Rama, ka vijuar turin e tij të prezantimeve ndërs ditën e sotme është ndalur në Lushnje ku ka prezantuar paraditen kandidatin Fatos Tushe. Në fjalën e tij Rama tha se gjatë kohës kur në qeveri ishte PD, hapi plagë të cilave sot u tregon gishtin.
Sipas Ramës, në 18 muaj qeveria që ai drejton ka ndërmarrë reforma për të mbyllur plagët që la PD.
“Ikën nga zyrat e shtetit me 1 milionë shuplaka dhe tani vijnë e tregojnë plagët që hapën vet dhe fajësojnë qeverinë duke besuar se shqiptarët janë budallenj dhe i marrin pas si dele.Procesin e legalizimeve e kthyen në një aferë ryshfeti dhe nuk lanë lavazh, magazinë e ngrehinë pa legalizuar mu në mes të rrugëve, në prona publike e pasuri kombëtare. Tani kanë gojë e flasin”, ka thënë Rama.
Sipas Ramës qeveria po paguan “faturat” e dëmeve të saj, dëme që sipas kryeministrit arrijnë në qindra milionë dollarë.
“Ne ndaluam hemoragjinë e plagëve të shkaktuara nga ata dhe filluam të ecim në drejtimin e duhur. Shembulli i kësaj është ai i energjisë, ku mbi 300 mijë konsumatorë janë bërë pjesë e asaj nisme për heqjen e njollës së turpit, duke nënshkruar kontratat për shlyerjen e detyrimeve të energjisë”, ka shtuar Rama.
