Tonelata të tëra me shalqin po shkojnë dëm në zonë e Lushnjes. Mungesa e tregut dhe çmimi i ulët ka bërë që sasi të tëra me shalqin të kalben akoma pa u shkulur.
Fermerët e fshatit Imshtë thonë se kanë investuar miliona lekë për të mbjellë prodhimet e tyre ndërkohë që nuk kanë se ku ta tregtojnë.
Prodhuesit e shalqinit në Lushnje dhe fermerët e fshatit Imshtë në njësinë administrative bubullimë po përballen me vështirësitë e tregut. Kostoja e tyre këtë verë për këtë produkt është tepër e lartë pasi është mbjellë afërsisht 400 hektarë, ndërkohë që çmimi nuk shkon as 3 lekë për kilogram.
Pavarësisht çmimit tepër të ulët, mungon oferta e tregtarëve çka ka bërë që një pjesë shumë e mirë e prodhimtarisë të shkojë dëm.
Fermeri thonë se kanë shpenzuar mbi 4 milionë leke te vjetra për fidanë e impute të tjera dhe sot ka marre vetëm 500 mije lekë të vjetra, ndërsa pjesa tjetër e prodhimit është prishur.
“Këtu nuk vjen njeri, se çan kokën njeri, nuk ka tregje malli, nuk vinë makinat, eksport s’ka. Këtu është një hektarë, kanë vajtur shpenzimet 5 milionë lekë dhe për të marrë, nuk është marrë asnjë lekë”, shprehet Feçor Musa, një prodhues i shalqirit.
Gjithashtu Ramadan Kapedani, një tjetër fermer shprehet se: “Këtij lloj shalqini i ka ikur koha e pjekjes dhe aktualisht është duke ngrënë veten. Nuk e kemi këputur më përpara se nuk kemi treg, nuk vjen tregtari ta marri. Shkakun nuk e dimë ku është”.
Sipas fermerëve të Imshtës zgjidhja mbetet vetëm nga shteti, ose nëpërmjet bashkimit të fermerëve në koperativa ose nëpërmjet grumbullimit nga pikat e mëdha, ne te cilat fermeri dorëzon prodhimin dhe tregtaret marrin furnizimin, në mënyrë që të shmanget abuzimi në çmime dhe lënia në parcelë e prodhimit.
