Raportuesja e posaçme e Parlamentit Evropian për Kosovën, Ulrike Lunaçek tha sot se, “Kosova ka perspektivë evropiane”, ndërsa vlerësoi se “duhet të përmbushë detyrimet e marra me marrëveshjen kontraktuale me BE-në”.
Gjatë një takimi me kryeministrin e Kosovës, Ramush Haradinaj, ajo vlerësoi dinamikën e re qeverisëse dhe angazhimin e tij personal në zbatimin e MSA-së dhe reformave në vend.
Ndërsa Haradinaj theksoi se, “Kosova po bën të gjitha përpjekjet që ta marrë statusin e vendit kandidat për anëtarësim në BE deri në fund të vitit të ardhshëm”. Ai vlerësoi punën dhe angazhimin e raportueses Lunaçek dhe mbështetjen e saj të parezervë për Kosovën në Parlamentin Evropian dhe në institucionin e BE-së.
Haradinaj tha se, Kosova do të përmbushë të gjitha obligimet që dalin nga marrëveshja kontraktuale me BE-në në bashkëpunim me partnerët ndërkombëtarë.
Axhenda e Reformës Evropiane dhe Marrëveshja e Stabilizim-Asociimit, sipas Haradinajt, po zbatohen me një dinamikë të përshpejtuar dhe po bëhen reforma të thella në fushën e sundimit të ligjit, zhvillimit ekonomik dhe në fushat e tjera./KosovaPress/b.d
