Nënkryetarja e Parlamentit Evropian dhe raportuesja e PE-së për Kosovën, Ulrike Lunaçek, konsideron se e ardhmja e Kosovës dhe e Serbisë është ngushtë e ndërlidhur dhe reciprokisht e kushtëzuar për ç’shkak të dyja duhet të punojnë në avancimin marrëdhënieve.
Rekomandimi për liberalizimin e vizave është një impuls shumë i mirë që duhet të shfrytëzohet, ka thënë Lunaçek, e cila nesër shkon në Beograd për të marrë pjesë në forumin civil në kuadër të Iniciativës së Berlinit.
Ajo, në portalin Europian Western Balkans, tërheq vërejtjen se Prishtina tani nuk duhet të fle në dafina, por duhet t’i intensifikojë përpjekjet lidhur me marrëdhëniet me Beogradin, përfshirë edhe zbatimin e të gjitha marrëveshjeve arritur me dialog, përcjell Tanjug.
Lunaçek ka thënë se Kosova ka bërë mjaft në përmbushjen e kritereve për liberalizim vizash e tani është në dorën e ministrave të Punëve të Brendshme të BE-së dhe të Parlamentit Evropian që të mbahet premtimi.
Nënkryetarja e PE-së po ashtu ka thënë se është optimiste se Kuvendi i Kosovës do të përmbushë edhe dy kriteret e mbetura dhe kështu qytetarëve përfundimisht do t’iu mundësohet lëvizja e lirë.
Fati evropian i Kosovës është në korrelacion të fuqishëm me përparimin e Serbisë dhe anasjelltas për ç’shkak, ka thënë ajo, është e domosdoshme të merren masa të mëtejme për t’u siguruar zhvillimi i vazhdueshëm i marrëdhënieve të mira ndërmjet dy shteteve.
“Integrimi i plotë i veriut të Kosovës bën pjesën kryesore të këtij procesi të cilin duhet ta avancojnë të dy palët pasi ky është faktori vendimtar në rrugën e tyre drejt anëtarësimit në BE”, ka thënë Lunaçek.
BW/di
