Dalja e lumit Erzen nga shtrati ka shkaktuar një situatë alarmante në Durrës, duke përmbytur qindra banesa dhe mijëra hektarë tokë bujqësore. Reshjet intensive kanë sjellë çarjen e argjinaturës në disa pika, duke goditur rëndë njësitë administrative Sukth dhe Katund i Ri.
Në Katundin e Ri, situata është kritike në fshatin Erzen, ku çarja e argjinaturës ka detyruar autoritetet të nisin evakuimin urgjent të banorëve. Përveç këtij fshati, uji ka depërtuar edhe në fshatrat Katund i Ri, Katund Sukth dhe Fllakë, duke lënë nën ujë rreth 500 hektarë tokë bujqësore.
Në njësinë Sukth, përmbytjet kanë prekur lagjet 2, 3 dhe 4 të qytetit, duke vështirësuar lëvizjen dhe jetesën e qytetarëve. Dëmet në bujqësi këtu janë akoma më të mëdha, ku raportohen rreth 2000 hektarë të përmbytur në zonat e Hamallajt, Rrushkullit, Kullës dhe Vadardhës.
Mjetet e rënda dhe grupet e punës ndodhen në terren për të mbyllur çarjet në argjinaturë dhe për të përforcuar pikat e dobëta. Ndërkohë, hidrovorët e Porto Romanos dhe Hamallajt po punojnë me kapacitet të plotë për të larguar flukset e mëdha të ujit drejt detit.
