Nga Artur Ajazi
Në vend të ndezë motorrët e opozitarit dhe partisë opozitare, Lulzim Basha ka ndezur në Partinë e tij Demokratike, “luftën e ftohtë” mes klaneve parazitiste, dhe dosjexhinjve bërrylaxhinj. Në vend të ribashkojë partinë e hallakatur dhe të ringrejë strukturat e shpërbëra, Lulzim Basha ka vendosur të lërë gjithë hapësirën e duhur për ta kthyer PD në fushë beteje mes të rinjve aventurierë dhe të vjetërve që duan të kapin ritmin e tyre. Realisht PD, është sot një parti ku vetëm politikë nuk prodhohet, ku vetëm elita nuk afrohet, ku vetëm liria dhe demokracia e mendimit dhe veprimit nuk tolerohen dhe zbatohen.
Atje, tek ajo parti përfundimisht do të ketë vend vetëm për hileqarët, dallkaukët, mediokërit, bastexhinjtë, tenderaxhinjtë, kumarxhinjtë, dhe të gjitha këto në kurriz të partisë. Lulzimi e ka ndezur qëllimisht “luftën e ftohtë” që në fakt mund të quhet edhe “lufta e kotë” në PD, për të parë nga lart fushën e betejës mes gladiatorëve dhe shërbëtorëve të tij besnikë, për të dalluar nga lart, kush meriton të mbahet dhe kush meriton të flaket nga partia, për të seleksionuar nga posti kryetarit kush duhet të rifutet në listë e ardhshme për deputet, dhe kush duhet të flaket nga oborri selisë.
Në një rrëfim të sinqertë në media, një ish-deputete e PD deklaronte se “në politikë kam takuar kolegë halabakë dhe injorantë”, ç’ka e bën të besueshme gjithçka ka ndodhur në atë parti në gjithë këto vite të ekzistencës saj. Afrimi halabakëve dhe injorantëve, afrimi i aventurierëve, madje dhe personave me precedentë penalë, mbetet alfa dhe omega e një partie të cilës vetëm “e djathtë” nuk mund ti thuash kryesisht në 5-6 vite e fundit. Ashtu si 27 vite më parë, edhe sot në PD e Lulzimit, ka dhe do vazhdojnë të jenë, persona me defiçite arsimore dhe intelektuale, ka dhe do të ketë persona me dosje në Prokurori dhe Gjykata, ashtu siç ka patur, ka dhe do të ketë edhe hafije të ish-Sigurimit të Shtetit.
Mungesa e elitave dhe kontribuesve në Partinë Demokratike të zotit Basha, veç të tjerave lidhet edhe me rrumpallën e bërë nga vetë ai me këtë forcë politik pas emërimit si “kryetar” 6 vite më parë. Një hap i nxituar dhe pse jo edhe i gabuar i Doktorit, të cilin nuk mund ta zhbëjë kurrë më, pas kaq ndryshimesh që kanë ndodhur në PD. Situata në dukje si e “qetë” pritet shumë shpejt të ndizet nga klani Berishës, i cili prej 1 viti është vënë nën shënjestrën e të rinjve të Lulzimit. Largimi me dhunë i elitave dhe emrave me kontribute, largimi së fundi edhe i dhëndërit të Doktorit, do të ishin padyshim sinjalet e para dhe vazhdimësia e një skenari të paramenduar qysh herët nga Lulzim Basha lidhur me të ardhmen e tij në PD.
Gjithkush e ka menduar dhe vazhdon ta mendojë, se si mundet të mosveprojë Doktori, pas situatave të tilla kur Partia Demokratike po privatizohet nga një njeri i vetëm, kur njeriu që ai përzgjodhi 17 vjet më parë, sot po sakrifikon partinë për të mbijetuar në politikë, kur pasardhësi i tij “besnik” nuk ngurron të bëjë marrëveshje dhe pazare për interesa personale. E vetmja zgjidhje që Lulzim Basha ka gjetur për të mbijetuar mes hamendësive dhe betejave klanore, mes trysnive dhe ndonjë “hakmarrje” të mundshme nga Doktori, është lufta mes klaneve. Natyrisht për Lulzimin rëndësi nuk kanë as Ervini dhe as
Grida, as Muli dhe as Spaho, por mbijetesa e tij si kryetar i një partie tashmë pa statut. Flakja edhe e Jamarbër Malltezit , ishte goditja e rradhës që “besniku partisë” i dha Doktorit, pasi siguroi mbijetesën e gjatë si kryetar partie. Tashmë Lulzimit, i mbetet të vështrojë nga lart ngërdheshjen e atyre, që ai ka paralajmeruar ti flakë në muajt ardhshëm nga ajo parti, për të siguruar përfundimisht shuarjen e çdo zëri kundër. Tallja që ai bëri nga Kuvendi Kombëtar me gjoja “afrimin e Topallit në PD”, ishte një tjetër sinjal negativ për ish-shefin e partisë, i cili në përpjekjet për të qenë i ftohtë me Lulzimin (duke munguar në mbledhjet e tij) duket se nuk do të mundë të rezistojë gjatë në betejën që ka nisur mes tij, dhe pasanikëve të rinj, që PD e shohin si sallë bixhozi nga ku mund të fitohen tendera, ofiqe dhe para qyl.
