Kryetari i PD-së Lulzim Basha nga çadra e protestës së opozitës akuzoi qeverinë se është e lidhur me krimin dhe drogën. Sipas tij, qeveria hoqi nga puna punonjës të ndershëm me qëllim që ti japte rrugën krimit dhe drogës.
“Do ta shembim këtë qeveri që përfaqëson republikën e vjetër. Është vendi dhe koha të kujtojmë shkaqet sesi republika e vjetër ra pre e krimit. Ajo shndërruar në strofkën e drogës. Punonjës të Policisë së Shtetit janë larguar në mënyrë të paligjshme. Ministri është i lidhur kokë e këmbë me krimin”, deklaroi Basha.
Sipas Bashës, qeveria do që të blejë zgjedhjet për të mbajtur këtë gjendje që t’i shpëtojnë drejtësisë për të mbajtur republikën e vjetër në këmbë.
“Ata duan votime fasadë të diktuara nga krimi. Ky është themeli i së keqes. Shumica e shqiptarëve vuajn këto pasoja. Qeveritarët janë bërë njësh me krimin. Kjo është një betejë për jetë a vdekje. Ose Shqipëria do kthehet në një vend të harruar, ose do ta shporrim këtë qeveri, që me qeveri teknike t’i japim vendit zgjedhje të lira dhe të ndershme”, deklaroi Basha.
“Si u arratis Arben Frroku? Pse u fsheh për 3 muaj kërkesa e ekstradimit të Mark Frrokut? Sepse policia i bindej urdhrave të një ministri të lidhur me kriminelët. Vendosja e Saimir Tahirit në krye të Ministrisë së Brendshme ishte pika e parë e planit. Pika e dytë ishte vendosja në drejtimin e policisë elementëve të lidhur me krimin. Kjo solli mbulimin e vendit me drogë, përfitimet e të cilës shkojnë në duart e kupolës kriminale, të lidhur drejtpërdrejtë me Edi Ramën dhe Saimir Tahirin”, shtoi Basha.
“Do krijojmë Xhandarmërinë kombëtare, një bashkëpunim mes Forcave të Armatosura dhe Policisë për të mundësuar që mijëra bijë dhe bija shqiptarësh me përgatitjen e duhur, me investimet nga taksat, të marrin pjesë dhe të kenë përgjegjësinë e tyre përkrah policisë për të siguruar rendin në luftën kundër drogës në çdo pëllëmbë të republikës së re. Ne do të rikthejmë kontrollin e vërtetë të territorit. Do të rikthejmë kontrollin e kufijve që Shqipëria të jetë një vend i sigurt, të ketë sipërmarrje të sigurta nga mëngjesi e deri në darkë“, tha Basha.
Kreu i opozitës solli në vëmendje edhe njëherë tjetër kushtin e opozitës për të dalë nga protesta, qeverinë teknike.
“Me një qeveri teknike do t’i japim vendit zgjedhje të lira dhe të ndershme ku qytetarët të vendosin për fatet e tyre dhe të fëmijëve të tyre, të vendosin për një qeveri të lufton drogën, për t’i dhënë Shqipërisë perspektivën europiane. Do të angazhohemi në luftën kundër krimit me zero tolerancë. Siç ia dolëm ta fusim Shqipërinë në NATO, të heqim vizat, bashkë do ia dalim ta fusim Shqipërinë në BE, duke luftuar pa mëshirë narkotrafikun“, tha Basha.
Javanews.al /ma.me
