Kryetari i Partisë Demokratike Lulzim Basha doli në një konferencë për mediat një ditë pas publikimit të formularëve të vetëdeklarimit nga ana e zyrtarëve të lartë të vendit. Ai tha se u vërtetuan denoncimet e opozitës për precedentët kriminal të disa kryebashkiakëve të së majtës. Por, teksa numëronte kundërshtarët, Basha “harroi” pa përmendur kryebashkiakun e Mallakastrës Agron Kapllanaj, përfaqësues i PD-së i cili rezultonte i dënuar në Itali me dy vite heqje lirie. Po ashtu, edhe pse nga radhët e opozitës dolën disa deputetë me precedentë, Basha nuk i përmendi.
“Ka dalë tashmë qartë se kryetari Bashkisë Kavajë, kryetari Bashkisë Kurbinit, kryetari Bashkisë Krujës do të dorëzojnë detyrën. Kryebashkiakë të tjerë mund të largohen e do të largohen pas verifikimit të formularëve. Shumë funksionarë të tjerë, deputetë, kryetarë bashkish, kanë fshehur të dhënat e tyre në formualrë. Sot kushdo ka mundësi ta tregojë me gisht, e ta thojë me emër e mbiemër poshtëruesin. Ky quhet Edi Rama. Ky është autori numër 1 i promovimit të vetëdijshëm i personave të inkriminuar. Numrat që kanë dalë, e ata që priten të dalin janë më shumë për të kuptuar kuk e ka çuar Shqipërinë Edi Rama.
Mos kujtoni se jam i lumtur që zbulohen kriminelët e Edi Ramës, kemi të bëjmë me një trend që Edi Rama futi në politikë. Rama i tha kujtdo, mos ruani integritetin, por nëse doni të ecni përpara, bëhuni si Bushi, Roshi, Bardhi, Prenga, Balili”, tha Basha.
Në mbyllje të deklaratës Basha tha se i premton shqiptarëve se “jemi të vendosur ta çojmë deri në fund dekriminalizimin”./a.m.
