Nëse nuk do të ishin aq moskokëçarës sa të mos harxhonin 50 mijë euro për tre ditë, sa të mos harronin pas tyre shishe ku kishin lënë gjurmët e gishtave dhe të mos lëviznin me tufa të mëdha parash në xhepa, me siguri Roland Liti, Alan Babameto dhe Robert Kulla do të ishin jashtë mureve të qelisë.
Autorët e grabitjes së të Bankës Kombëtare Tregtare në ish-Bllok janë tradhtuar nga një shishe uji, raporton Abc News.
Në mëngjesin e 6 gushtit kur dhe u konstatua grabitja ne zemrën e zonës së ish-Bllokut, grupi hetimor gjeti provat e para në një shishe uji. Një pakujdesi e paimagjinueshme që pritet t’i kushtoje shtrenjtë tre personave që për një fundjave gërmuan murin e një lokali tw boshatisur dhe e gjeten veten përballë xhiros ditore të filialit të BKT-së.
Zbulimi i autorëve të vjedhjes së bankës erdhi pas gjetjes së një gjurme gishti të Roland Litit, një person me precedentë të mëparshëm penalë për vjedhje.
Pas gjetjes se gjurmës, nuk ka qenë më dhe aq i vështirë identifikimi i personit përgjegjës, pasi si Roland Liti, ashtu dhe Robert Kulla ishin personazhe te njohura për drejtësinë dhe gjurmët e tyre ishin lehtësisht tw verifikueshme, pasi i kishin fiksuar edhe më herët kur ishin dënuar, i pari për vjedhje, ndërsa Kulla për rrëmbim dhe pengmarrje
Nga ky moment 37-vjeçari është mbajtur në vëzhgim duke zbuluar lidhjen me Robert Kullën dhe 23-vjeçarin tjetër të vënë në pranga, Alan Babameto.
Sipas Abc News, tre autorët i kanë ndarë mes tyre 200 milionë lekët që grabitën. Shuma e konsiderueshme është ndare nga Liti, Kulla dhe Babameto që nuk kanë nguruar gjatë kësaj kohe të shfrenohen në lukse, duke lënë dhe gjurmë në sistemin TIMS për hyrje-daljet e tyre. Kështu vetëm për 3 dite qëndrimi ne Malin e Zi, tre autorwt e grabitjes kanw shpenzuar me shume se 1/3 e parave të përfituara pa djersën e ballit.
Kulla, “truri” i operacionit
Robert Kulla, djali i një prej personazheve më të njohur të botës së krimit në vitet ’90, Nehat Kullës, dyshohet se është organizatori si dhe personi që ka shtyrë dy bashkëpunëtorët e tjerë për të realizuar vjedhjen e kasafortës së bankës në zonën e ish-Bllokut.
Sipas Top Channel, nga hetimet e para dhe në bazë të përgjimeve, grupi hetimor ka krijuar dyshime se 35-vjeçari drejtonte grupin që realizoi vjedhjen spektakolare të gati 200 mijë dollarëve.
Po ashtu mësohet se në momentin e ndalimit nga ana e forcave operacionale, Robert Kulla ka sfiduar verbalisht forcat e policisë./a.m.
