Kryeministri i Ukrainës Denys Shmyhal ka njoftuar ditën e sotme se pushtimi rus i vendit të tij ka shkatërruar më shumë se 25,000 km rrugë, disa qindra ura dhe 12 aeroporte.
“Rreth 35% e ekonomisë aktualisht nuk funksionon. Më shumë se 300,000 km katrorë tokë ishte minuar ose kontaminuar me bomba”, tha ai.
Sipas vlerësimeve të ndryshme të bëra publike edhe më parë, dëmi i drejtpërdrejtë i agresionit rus në Ukrainë në infrastrukturën dhe ekonominë është rreth 600 miliardë dollarë.
“Faza tjetër do të jetë rivendosja e infrastrukturës kryesore, si furnizimet me energji dhe ujë, dhe rindërtimi i urave dhe rrugëve. Ndërsa faza e tretë do të jetë rindërtimi i madh i vendit tonë. Ne nuk duam vetëm të restaurojmë tullat dhe betonin. Ne duam të ndërtojmë një shtet të ri”, ka deklaruar ai
“Ne jemi të bindur se agresori duhet të paguajë për shkatërrimin që ka krijuar. Duhet të jetë e qartë, në kurriz të aseteve të ngrira ruse – të konfiskuara dhe transferuara në Ukrainë për rivendosjen e përbashkët të shtetit tonë”, tha ai.
