Presidenti amerikan Donald Trump ka deklaruar se SHBA është afër arritjes së një marrëveshjeje mineralesh me Ukrainën.
“Mendoj se jemi shumë afër. Unë mendoj se ata e duan atë dhe kjo është një gjë e rëndësishme, është një punë e madhe. Kjo duhet të ishte nënshkruar shumë kohë përpara se të vinim ne. Duhet të ishte nënshkruar nga Biden, por ai nuk dinte shumë për atë që po bënte. Lufta nuk duhet të kishte ndodhur kurrë”, tha presidenti Trump.
Këshilltari për sigurinë kombëtare, Mike Waltz tha se pret që presidenti i Ukrainës Volodymyr Zelensky të nënshkruajë marrëveshjen me Shtetet e Bashkuara, si pjesë e përpjekjeve për t’i dhënë fund luftës në Ukrainë.
Zelensky ka bërë të ditur se më pak se 20% e burimeve minerare të Ukrainës, duke përfshirë rreth gjysmën e pasurive të rralla nëntokësore të saj, janë nën pushtimin rus. Këto pasuri janë të rëndësishme në prodhimin e magneteve, motorëve elektrikë dhe elektronikës së konsumit dhe presidenti ukrainas ka deklaruar se Moska mund t’i japë ato burime për aleatët e saj Korenë e Veriut dhe Iranin, të dy armiq të betuar të SHBA-së.
Teksa këtë javë sulmoi Zelenskyn, të cilin e quajti “diktator” që manipuloi SHBA-në për të shpenzuar rreth 350 miliardë dollarë për një luftë që nuk mund të fitohet, Trump i pyetur nga gazetarët nëse kishte të njëjtin mendim edhe për Putin u duk se nuk mbajti të njëjtin qëndrim.
“Unë mendoj se presidenti Putin dhe presidenti Zelenskiy do të duhet të mblidhen së bashku. Ne duam të ndalojmë vrasjen e miliona njerëzve. Kemi ushtarë të rinj që vriten. Nuk e di nëse i keni parë fotografitë që unë pashë në fushën e betejës nga sateliti”, tha Trump.
Trump mohoi lajmet se ai mund të vizitojë Moskën për bisedime më 9 maj, ditën kur Rusia feston fitoren e saj ndaj nazistëve.
