Raketat ruse të konsideruara si të avancuara po dështojnë deri në 60% të rasteve në Ukrainë, thanë për Reuters tre zyrtarë amerikanë me njohuri në të dhënat e inteligjencës vendase duke shpjeguar kështu edhe përparimin e dobët të ushtrisë së Rusisë atje.
Që kur presidenti Vladimir Putin urdhëroi pushtimin e Ukrainës më 24 shkurt, Rusia nuk ka arritur të arrijë objektivat bazë, si neutralizimi i forcës ajrore të Ukrainës, pavarësisht forcës së madhe që ka.
Zyrtarët amerikanë, të cilët folën në kushte anonimiteti për shkak të ndjeshmërisë së informacionit, nuk dhanë prova për të mbështetur vlerësimin dhe nuk zbuluan se çfarë saktësisht po shkaktonte shkallën e lartë të dështimit të raketave ruse.
Reuters raporton se nuk ishte në gjendje të verifikonte në mënyrë të pavarur shifrat.
Megjithëse Reuters nuk mund të përcaktonte se cila do të ishte një normë standarde e dështimit për raketat “cruise”, dy ekspertë të intervistuar nga Reuters thanë se çdo shkallë dështimi mbi 20% do të konsiderohej e lartë.
Dështimet e raketave
Zyrtarët e mbrojtjes amerikane u thanë gazetarëve këtë javë se Pentagoni vlerëson se Rusia ka lëshuar më shumë se 1 100 raketa të të gjitha llojeve që nga fillimi i luftës. Zyrtarët amerikanë deri më tani nuk kanë thënë se sa prej tyre goditën objektivat dhe sa dështuan.
Duke cituar inteligjencën amerikane, tre zyrtarë amerikanë thanë se Shtetet e Bashkuara vlerësonin se shkalla e dështimit të Rusisë ndryshonte çdo ditë, varej nga lloji i raketës që do të lëshohej dhe ndonjëherë mund të kalonte 50%. Dy prej tyre thanë se arriti deri në 60%.
Një nga zyrtarët tha se inteligjenca tregoi se raketat ruse të lëshuara nga ajri kishin një shkallë dështimi në intervalin 20% deri në 60%, në varësi të ditës.
Rusia është parë duke vënë në dispozicion dy lloje të raketave “cruise” nga ajri në Ukrainë, Kh-555 dhe Kh-101, sipas Projektit të Mbrojtjes Raketore të Qendrës për Studime Strategjike dhe Ndërkombëtare.
Dështimet mund të përfshijnë çdo gjë, nga dështimet e lëshimit deri te një raketë që nuk shpërthen kur godet objektivin. /m.j
