Kryeministri Edi Rama është i vendosur për t’i dhënë fund kultivimit të kanabisit në vendin tonë. Në kuadër të realizimit të këtij objektivi, kreu i Qeverisë ka mbledhur sot në Kryeministri strukturat e policisë.
“Jemi bashkë në një operacion vendimtar për t’i dhënë fund historisë së kanabisit. Të gjitha të dhënat janë inkurajuese, ashtu sikur u paraqit jemi para një situate të përbysur nga pikëpamja e hartës së kultivimit. Baza e planit në luftën kundër kanabisit është solide dhe zbatimi i kësaj baze në letër është një shembull i qartë, që nëse vazhdohet me këtë ritëm dhe me këtë vëzhgim.
Inkurajoj drejtuesit e policisë që të jenë të pamëshirshëm ndaj cdo elementi që shfaqet pasiv apo i përfshirë në mos njoftimin e fenomenit në rast se del në sipërfaqje. Patjetër që është një luftë e cila nuk mbyllet njëlloj si historia e një sëmundje pas operacioni, por ne jemi të vendosur ta fshijmë njollën që i ka mbetur Shqipërisë nga kjo histori dhe pastaj të luftojmë fenomenin në nivele të vogla në zona të thella” tha Rama
Drejtori Haki Çako deklaroi se këtë vit janë planifikuar 30% më shumë fluturime se viti i kaluar, deri tani janë kryer 21 fluturime dhe janë konstatuar vetëm 7 raste.
Sipas policisë risia e këtij viti ndër të tjera është krijimi dhe implementimi në rrjetin informatik të Policisë së Shtetit i sistemit elektronik “Ueb-GIS”, nëpërmjet të cilit bëhet i mundur hedhja, administrimi dhe evidentimi të dhënave për rastet e kultivimit të bimëve narkotike në shkallë vendi.
Me heret Rama shkruante ne FB se kete vit i japim fund historise se fenomenit.
“Jemi zotuar që këtë vit do të shkruhet fjala FUND në historinë e gjatë të kultivimit të kanabisit në shkallë të gjerë dhe ky zotim do të mbahet me se s’bën për #SHQIPËRINËQËDUAM🇦🇱✌🇪🇺”, shkruan kryeministri Rama, teksa transmeton live takimin, në rrjetin social “Facebook”.
a.ç
