Lufta ndaj informalitetit është një luftë që i shërben më shumë se kujtdo tjetër, sipërmarrësit të ndershëm, që deri dje vuante nga konkurrenca e pandershme”, deklaroi sot pasdite Kryeministri Edi Rama, i pranishëm në aktivitetin për Përmirësimin e Eficencës Tatimore, të organizuar nga USAID.
Kryeministri nisi fjalën e tij duke thënë se qëllimi i qeverisë është të ndryshojë mendësia e administratës së tatimeve dhe bashkëpunimi me USAID në këtë drejtim është shumë i rëndësishëm.
“Ky bashkëpunim vjen në momentin më të duhur ku vendi edhe pse është në drejtim e duhur, siç tha Sekretari Shtetit, Kerry, por është në luftë të hapur me informalitetin. Më pëlqen shprehja, që sa më shpejtë një popull meson të paguajë taksat, aq më shpejtë ky popull e blenë qytetërimin. Prandaj shqiptarët duhet të mësojnë të paguajnë taksat dhe aq më shpejtë do të mund ta blejnë qytetërimin që të gjithë e dëshirojnë për fëmijët, tha Rama.
“Për këtë është e rëndësishme që USAID-i dhe Drejtoria e Përgjithshme e Tatimeve të punojnë së bashku për të administruar më mirë sistemin tatimor, duke adresuar çdo aspekt të tij riorganizohet apo ristrukturohet”, vijoi Rama.
“Kemi ende shumë për të bërë sepse duhet të ndryshojmë mendësinë e inspektorëve të tatimeve dhe të gjithë atyre që janë pjesë e skuadrës që punon tek tatimet. Kemi pasur një administratë tatimore që punon pa tru, por vetëm me sy me vesh dhe me forcë. Ndërkohë që përpjekja e nisur në vitin 2013 është që të punojnë me tru. Ne duam shërbimin ndaj sipërmarrjes, jo gjuetinë për sipërmarrësit. Ri-organizmi i nisur ka sjellë një rritje shumë të konsiderueshme të të ardhurave dhe faktikisht nëse e marrim në vlerë absolute, vetëm në 9-mujorin e vitit të shkuar kemi arritur 242 milion euro më shumë se në 2012-ën, një vit para se të vinim ne në 2013-ën. Ne kemi trashëguar dhe një borxh të lartë të fshehur ndaj kompanive, 720 milion dollar, që kishin shkuar për të akredituar fushatën elektorale të ish partisë në pushtet. Ne e paguam atë brenda pak kohësh për të vendosur një gur themeli në marrëdhëniet me sipërmarrjen. Tashmë borxhi publik është 64.6%”, nënvizoi Rama.
Duke folur për luftën ndaj informalitetit, Kryeministri u shpreh se falë këtij operacioni janë regjistruar 33% më shumë biznese aktive se dy vite më parë. “Falë këtij operacioni janë regjistruar 627 mijë të punësuar, ndërkohë që dy vite më parë 471 mijë të tillë. Falë këtij operacioni ne kemi mundur të bëjmë dhe disa hapa për të lehtësuar biznesin e vogël dhe mund të shkojmë edhe më tej. E rëndësishme është që operacioni të vijoi deri në fund e të mos jetë vetëm ndëshkimor, por ndëshkimor dhe inkurajues për të drejtën, pasi përfituesi më i madh duhet të jetë vetëm sipërmarrësi që paguan drejtësisht taksat, e që pak kohë më parë ishte i sulmuar nga konkurrenca e pandershme. Ne jemi të vendosur ta çojmë përpara këtë operacion”, tha Rama, duke shtuar se mbështetja e SHBA-ve në këtë drejtim do të konsistojë në rritjen e kapaciteteve analizuese dhe ekipit drejtues.
“Kjo është muzikë për veshët tanë. Këtu është dhe sfida jonë kryesore”, përfundoi Rama.
