UNICEF ka publikuar shifrat tronditëse të fëmijëve që janë vrarë apo plagosur gjatë luftës në Ukrainë.
Sipas njoftimit të OKB-së përgjatë këtyre 6 muajve UNICEF ka verifikuar se të paktën 972 fëmijë janë vrarë ose plagosur nga dhuna.
Kjo përfaqëson një mesatare prej më shumë se pesë fëmijë të vrarë në ditë. Por, drejtoresha Ekzekutive e UNICEF-it Catherine Russell ka deklaruar se “ne besojmë se numri i vërtetë është shumë më i lartë”.
Shumica e fëmijëve humbën jetën nga shpërthimet e shumta. Ndërkohë, pothuajse çdo fëmijë në Ukrainë është ekspozuar ndaj ngjarjeve thellësisht shqetësuese. Ata që ikin nga dhuna janë në rrezik të konsiderueshëm të ndarjes familjare, abuzimit, shfrytëzimit seksual, sulmeve të mëtejshme dhe trafikimit, thotë UNICEF.
Për më tepër, armiqësitë në rritje kanë shkatërruar sistemin arsimor. UNICEF vlerëson se 1 në 10 shkolla janë dëmtuar ose shkatërruar.
“Fëmijët e Ukrainës kanë nevojë urgjente për siguri, stabilitet, akses në mësim të sigurt, shërbime për mbrojtjen e fëmijëve dhe mbështetje psikosociale. Por më shumë se çdo gjë, fëmijët e Ukrainës kanë nevojë për paqe”, tha Russell.
Deri në mëngjesin e 22 gushtit, 373 fëmijë u vranë dhe 723 të tjerë u plagosën për shkak të agresionit rus në Ukrainë, njoftoi Zyra e Prokurorit të Përgjithshëm.
Rreth 260 mijë fëmijë janë deportuar në Rusi.
/e.d
