Ministri i Punëve të Brendshme Fatmir Xhafaj priti sot një delegacion të BE-së të kryesuar nga Eduart Auer, shef i Divizionit për Ballkanin Perëndimor, i shoqëruar nga zyrtarë të tjerë të lartë të Brukselit si dhe ambasadorja e BE-së në Tiranë, Romana Vlahutin.
Mësohet se çështjet ku u ndalën të pranishmit ishin lufta kundër kultivimit të kanabisit, lufta kundër krimit të organizuar, efiçenca për rritjen e integritetit dhe profesionalizmit të punonjësve të Policisë së Shtetit. MPB njofton se gjithashtu u vu theksi tek bashkëpunimi me agjencitë e tjera ligjzbatuese në vend, veçanërisht me Prokurorinë.
Ministri i Brendshëm Fatmir Xhafaj prezantoi prioritetet e detyrës së tij dhe masat e pritshme në këtë kuadër. Përfaqësuesit e BE-së vlerësuan qartësinë e prioriteteve dhe veçanërisht miratimin e Planit Kombëtar të Veprimit kundër kultivimit dhe trafikimit të kanabisit.
Ata përshëndetën reagimin e ashpër të autoritetit, në rastin e ditëve të fundit në Policinë e Kurbinit, ku u ndëshkuan disa oficerë policie pas zbulimit të një parcele me bimë narkotike. Delegacioni i Bashkimit Europian premtoi përshpejtim të asistencës dhe mbështetje me pajisje të teknologjisë së lartë për Policinë e Shtetit në luftën kundër krimit të organizuar dhe trafiqeve. Në takim u ra dakord gjithashtu për një koordinim të asistencës dhe përfaqësive të tyre në Shqipëri.
