Lufta kundër terrorizmit e në veçanti ISIS-it ishte fokusi i bisedimeve mes Presidentit Bujar Nishani dhe Sekretarit të Përgjithshëm të NATO-s Jens Stoltenberg, i cili i shprehu kreut të shtetit mirënjohjen për kontributin e dhënë nga Shqipëria.
Stoltenberg gjithashtu tha se Shqipëria duhet të rrisë investimet në fushën e mbrojtjes, duke qenë njëri ndër vendet që garanton stabilitet në Ballkan.
“Keni biseduar për të forcuar marrëdhënien tonë dhe për të zgjeruar bashkëpunimin. I jam mirënjohës Shqipërisë për kontributin në aleancën tonë. Vlerësoj edhe kontributin e Shqipërisë për të luftuar ISIS. Ju luani një rol të rëndësishëm në ndihmën ndaj NATO-s për të realizuar angazhimet e saj. Shqipëria ka ndihmuar për stabilitet në Ballkanin Perëndimor. Muajin tjetër do të ndërmarrim një hap të rëndësishëm për nënshkrimin e protokollit të Malit të Zi, pasi ky vend ka bërë hapa të rëndësishëm drejt anëtarësimit në NATO.”- tha Sekretari i NATO-s.
Presidenti Bujar Nishani theksoi se Shqipëria do të mbështesë çdo përpjekje dhe angazhim të aleancës së NATO në kuadër të çështjes së sigurisë. Njësoj si edhe Stoltenberg, Nishani u shpreh se Shqipëria duhet të rrisë më shumë investimet në fushën e mbrojtjes dhe të sigurisë.
