Ambasada e Shteteve të Bashkuara në Tiranë i ka dhuruar Policisë së Shtetit ditën e djeshme pajisje hetimi të cilat kapin vlerën e 100 mijë dollarë.
Lajmi është bërë publik sot nga ambasada e ShBA-ve përmes një postimi në rrjete sociale, ku thuhet se Memorandumi që listonte pajisjet e dhuruara u nënshkrua nga Shefja e Zyrës së Sigurisë Rajonale në Ambasadën e SHBA në Tiranë, Karen Riley dhe Drejtori i Përgjithshëm i Policisë së Shtetit, Ardi Veliu.
Bëhet me dije se dhuratat u financuan nga Shërbimi i Sigurisë Diplomatike dhe Asistencës për Trajnimin Anti-Terrorizëm me qëllim rritjen e efikasitetit në luftën kundër terrorizmit, krimit kibernetik por edhe kërcënime të tjera.
”Ambasada e Shteteve të Bashkuara në Tiranë dhuroi dhe dorëzoi dje për Policinë e Shtetit pajisje hetimi prej 100,000 dollarësh të financuara nga Shërbimi i Sigurisë Diplomatike dhe Asistencës për Trajnimin Anti-Terrorizëm. Këto pajisje do të ndihmojnë forcat tona partnere ligjzbatuese të mbrojnë shqiptarët duke luftuar terrorizmin, krimin kibernetik dhe kërcënime të tjera. Shefja e Zyrës së Sigurisë Rajonale në Ambasadën e SHBA në Tiranë, Karen Riley dhe Drejtori i Përgjithshëm i Policisë së Shtetit Ardi Veliu shqyrtuan dhe nënshkruan memorandumet që listonin pajisjet e dhuruara”, thuhet në njoftimin e ambasadës amerikane.
