Lufta e re e Ftohtë, hakmarrja e Rusisë ndaj Perëndimit: Putin synon të shkatërrojë euron dhe dollarin
Vazhdon lufta e presidentit rus Vladimir Putin kundër Perëndimit. Marrëveshjet tregtare të firmosura me Kinën dhe partnerët e tjerë kombëtarë në muajt e kaluar e kanë konfirmuar. Putin kërkon të shkatërrojë dollarin për të ulur në gjunjë Shtetet e Bashkuara. Por jo vetëm kaq. Burime afër Kremlinit flasin për një draft të stiluar nga vetë Putin me një objektiv akoma më ambicioz: eleminimin e dollarit dhe të euros nga shkëmbimet tregtare që bëhen mes vende të CIS (Komonuellthi i Shteteve të Pavarura).
Kjo nënkupton krijimin e një tregu financiar unik të organizatës rajonale, ku bëjnë pjesë 9 vende të ish–Bashkimit Sovjetik, mes tyre Rusia, Armenia, Bjellorusia, Kazakistani e Moldavia. Drafti është publikuar në portalin online të Kremlinit dhe pritet të dërgohet për miratim në parlamentin rus.
Vendin e Dollarit dhe Euros në shkëmbimet tregtare do ta zënë monedhat e shteteve anëtare. Sipas Kremlinit, ky hap synon të zgjerojë përdorimin e monedhave kombëtare në tregtinë me jashtë, duke i dhënë më tepër likuiditet tregjeve vendase.
Synohet gjithashtu të arrihet stabiliteti makroekonomi, përmes shkëputjes së varësisë nga luhatjet e monedhave perëndimore. Pas miratimit, projektligji do të hyjë në zbatim në periudhën 2025 – 2030. Një sistem i ngjashëm i shkëmbimeve tregtare aplikohet pjesërisht mes Rusisë dhe Kinës
Pasojat e një lëvizjeje të tillë, dhe pse jo të menjëhershme, mund të jenë të rënda në një periudhë të gjatë. Si Kina ashtu edhe Rusia kanë nisur ti heqin asetet nga dollari, duke konfirmuar teorinë tashmë prej kohësh të ç’dollarizimit. /Wall Street Italia
