Sergey Markov, ish-këshilltar i presidentit rus Vladimir Putin për politikën e jashtme, paralajmëroi se përshkallëzimi i tensioneve mes Rusisë dhe Europës mund të çojë në një konflikt të drejtpërdrejtë.
Në një intervistë për Corriere della Sera, Markov thotë se marrëdhëniet mes Moskës dhe Europës po ecin mbi “një fill shumë të hollë” dhe se, nëse vazhdon ajo që ai e konsideron politikë përshkallëzimi të Europës, “një formë lufte do të bëhet e pashmangshme”.
Sipas tij, Rusia e percepton gjithnjë e më shumë Europën si një armik dhe mund të reagojë ndaj masave që Moska i konsideron sulme. Markov përmend si skenar të mundshëm bllokimin e ngushticave në Detin Baltik, ndërsa nuk përjashton as goditjen e objektivave që lidhen me prodhimin e dronëve në Ukrainë apo vende të tjera europiane.
“Do të detyrohet të përgjigjet, sepse në fakt Europa tashmë po sulmon Rusinë. Perëndimi ka shënjestruar tashmë disa anije ruse që transportonin lëndë të para dhe Bashkimi Europian ka vendosur se është e mundur të sekuestrohet nafta ruse. Rusia do të përgjigjet dhe Putin ka thënë se edhe ne do të godasim anijet e kundërshtarëve kudo në oqeane. Skenari më realist është që ne të bllokojmë ngushticat në Detin Baltik.
Ekziston edhe një skenar tjetër, më pak i mundshëm, por jo i pamundur: Rusia mund të godasë, si në territorin ukrainas ashtu edhe gjetkë, fabrikat që do të prodhojnë dronë me të cilët do të vriten qindra mijëra rusë. Siç e dini, kjo mundësi është përmendur tashmë edhe në lidhje me Britaninë e Madhe.”, tha ai.
Duke folur për SHBA-në, Markov thotë se Donald Trump nuk ka interes të përfshihet drejtpërdrejt në luftën në Ukrainë, kryesisht për shkak të rrezikut të një përplasjeje bërthamore me Rusinë dhe kostove për buxhetin amerikan. Ai e sheh vizitën e drejtorit të CIA-s në Moskë në këtë kontekst dhe jo domosdoshmërisht si një zhvillim të lidhur drejtpërdrejt me Ukrainën.
