Presidenti Ilir Meta ka pritur këtë të premte në një takim të veçantë Shefin e Shtabit të Ushtrisë Italiane, Gjen. Claudio Graziano, nga ku është biseduar për marrëdhëniet mes dy vendeve dhe forcimin e lidhjes së Italisë e Shqipërisë brenda NATO-s.
“Shqipëria dhe Italia janë dy vende fqinjë që përballen me sfida dhe rreziqe të përbashkëta, cilat kërkojnë bashkëpunim dhe koordinim të suksesshem mes Forcave të Armatosura”, nënvizoi Presidenti Meta.
Presidenti Meta dhe Gjeneral Graziano ndanë pikëpamjen e njëjtë se ruajtja dhe garantimi i kufijve detarë e ajrorë dhe përballimi me sukses i emigracionit, trafikut të paligjshëm dhe terrorizmit mbeten përparësi për sigurinë e Shqipërisë, Italisë dhe të rajonit të Ballkanit.
Gjithashtu, Kreu i Shtetit i shprehu mirënjohjen Gjeneralit Graziano për ndihmën e vazhdueshme që Italia i ka dhënë Forcave tona të Armatosura në ngritjen e tyre profesional dhe mbështetjen në procesin e rritjes së kapaciteteve logjistike dhe përvojës në misionet e tyre jashtë./a.m.
