Pjetër Lucaj është një sipërmarrës shqiptar që prej 22 vitesh jeton dhe punon në Shtetet e Bashkuara Amerikane.
Pjetri është dhe një nga kontribuesit e paradës së shqiptarëve në New York, paradë e cila tanimë është kthyer në një traditë.
Më 10 Qershor, ai ka qenë aty në mes të shqiptarëve të tjerë, ku dhe ka dhënë një intervistë për emisionin “Opinion” në Tv Klan përballë gazetarit Blendi Fevziu dhe ka treguar si është jeta e tij në Amerikë.
Pjetër Lucaj: 22 vite që kam në Amerikë. Kam ardhur nga Malësia mbi Shkodër, pjesë e Malit të Zi.
Blendi Fevziu: Me se u more kur erdhe?
Pjetër Lucaj: Ditët e para kam filluar në restorante duke punuar. Sot kemi një biznes shumë të mirë. Kam punuar për disa njerëz të mi dhe pastaj bëra biznesin tim. Është restorant italian. Mua më pyesin italianët “pse ju shqiptarët keni marrë restorante italiane?”. Shqiptarët punojnë shumë. 98 për qind të restoranteve italiane në New York janë pronësi e shqiptarëve ose në menaxhim të tyre.
Blendi Fevziu: A është interesante të punosh në restorant?
Pjetër Lucaj: Shumë interesante është të punosh në restorant. Populli amerikan është shumë interesant. Pastërtia është shumë e rëndësishme. Punoj 7 ditë të javës për restorantin, rreth 12 orë në 7 ditë të javës. Duhet të punosh shumë dhe të kursesh shumë në Amerikë. Ardhja në fillim ishte e vështirë, por unë kisha përkrahjen e vëllezërve të mi. Sivjet kam qenë 3 herë në Mal të Zi. Kam shtëpinë 300 vjeçare në Mal të Zi dhe po mendoj të bëj një resort familjar vetëm për familjen time. Kam gruan, kam 2 vajza dhe 1 djalë. Shkojmë në vendlindje, edhe sivjet do të shkojmë në Mal të Zi, Shqipëri dhe Kosovë. Gjyshi im ka thënë se “nëse vdes, m’i çoni eshtrat matanë kufirit, në Shqipëri”.
/a.r
