Kryetari i AAK-së, Ramush Haradinaj është liruar nga autoritetet sllovene, pas ndalimit disaorësh të tij në aeroportin e Lubjanës. Ambasada e Kosovës në kryeqytetin slloven kanë konfirmuar lajmin.
Por proçedurat nuk kanë përfunduar dhe kreut të AAK-së i kanë marrë pasaportën pas daljes në gjykatë dhe për momentin ai ndodhet në një hotel të Lubjanës. Këtë të dhënë e ka konfirmuar në një konferencë të jashtëzakonshme për shtyp Ardian Gjini, nënkryetar i AAK-së.
Haradinaj është ndaluar në Aeroportin e Lubjanës, në Slloveni, në bazë të një urdhër arresti të lëshuar nga policia e Serbisë në vitin 2004.
Ai është ndaluar derisa po kthehej nga një vizitë zyrtare në Berlin. Aleanca për Ardhmërinë e Kosovës e konsideron këtë veprim “ndërhyrje me qëllime të njëjta dhe identike si të policisë serbe, ndaj Ramush Haradinajt, ish-kryeministër i Kosovës dhe udhëheqës i njohur i luftës për lirinë e Kosovës. AAK kërkon veprim të menjëhershëm për lejimin e zotit Haradinaj në udhëtimin e tij drejt Prishtinës, dhe e konsideron këtë ndalim tendencë të qëllimshme ndaj personalitetit dhe gjithë asaj që përfaqëson zoti Haradinaj. Fletarrestet serbe, njollosjet dhe sulmet ndaj zotit Haradinaj janë zhvleftësuar dhe demantuar disa herë dhe në forma të ndryshme”, thuhet në komunikatën e AAK-së.
Zyrtarë të kësaj partie po protestojnë para dyerve të ambasadës sllovene në Prishtinë. Ata thanë se zoti Haradinaj, nuk pranon të dalë vullnetarisht para gjykatësit slloven lidhur me urdhër arrestin serb.
“Pafajësinë e kam të dëshmuar ndërkombëtarisht. Nuk kam asgjë me sistemin e drejtësisë sllovene e as ndërkombëtare”, citohet të ketë thënë zoti Haradinaj, duke kërkuar nga Sllovenia ta pastrojë ”sa më parë sistemin nga reliktet shpifëse të Beogradit, që datojnë që nga viti 2004 dhe ende edhe sot i konsideron si valide. Kjo sjellje nga shteti slloven është e papranueshme dhe shumë ofenduese, si për mua, po ashtu edhe për Kosovën”, citohet të ketë thënë zoti Haradinaj.
Qeveria e Kosovës, u shpreh e shqetësuar me faktin se sic thuhet, “urdhër arrestet e tilla edhe më tutje trajtohen si valide në vende të caktuara, përkundër faktit se lidhur me këto pretendime, zoti Haradinaj pafajësinë e tij e ka dëshmuar në instancat më larta të drejtësisë ndërkombëtare. Qeveria e konsideron se nuk ka asnjë arsye që zoti Haradinaj edhe më tutje të përballet me situata të tilla dhe apelon te autoritetet sllovene që sa më parë të mundësojnë që zoti Haradinaj të kthehet në Kosovë”.
Autoritetet në Kosovë kanë kërkuar disa herë nga policia ndërkombëtare, Interpol që mos merren parasysh fletarrestimet e lëshuara nga autoritetet e Serbisë për qytetarët e Kosovës. Kërkesat kishin pasuar disa raste të ndalimit nëpër aeroporte të drejtuesve të ish Ushtrisë Çlirimtare të Kosovës në bazë të fletarrestimeve të lëshuara nga Beogradi.
Mosnjohja e pavarësisë së Kosovës nga një numër shtetesh që janë edhe pjesë e Interpolit e e vështirëson shumë edhe bashkëpunimin e saj me këtë organizatë.
Zyrtarët në Kosovë thonë ndërkaq se Serbia nuk ka më juridiksion mbi Kosovën dhe rrjedhimisht të gjitha fletarrestimet e lëshuara prej saj janë të pavlefshme. Autoritetet në Kosovë, tash për tash nuk e dinë se sa fletarrestime të tilla janë ngritur kundër qytetarëve të vendit.
