Janë prezantuar këtë të enjte gjetjet e sondazhit për korrupsionin, një anketim i bërë nga IDRA në bashkëpunim me USAID. I pranishëm, Ambasadori i SHBA-ve Donald Lu tregoi për herë të parë se një politikan i kishte thënë se shqiptarët nuk e kuptonin në fakt reformën në drejtësi, një pretendim që sipas ambasadorit tregonte më së miri arrogancën e elitës politike shqiptare. Lu shtoi se korrupsioni dhe reforma në drejtësi kuptohen më së miri nga shqiptarët, pasi janë ata që e vuajnë më së shumti këtë fenonem, të cilin Lu e ka ilustruar me një histori të një gjyqi të korruptuar.
“Një nga arsyet pse më intereson kaq shumë korrupsioni dhe reforma në drejtësi është historia që kam dëgjuar për një grua e cila ishte privuar nga fëmijët e saj prej gjykatësit… gjyqtari i dha bashkëshortit të saj, një kriminel dhe dhunues i dënuar më parë, të gjithë pasurinë dhe kujdestarinë për dy nga tre fëmijët e saj.. por pse ndodhi kjo? Sepse ai gjyqtar ishte i korruptuar.
Të pasurit dhe të fortët e blejnë drejtësinë, ndërsa gratë, të varfërit dhe ata që s’kanë para, janë viktimat…
Kam patur një diskutim me një politikan, që pretendonte se populli shqiptar nuk mund ta kuptojë në të vërtetë reformën në drejtësi… sinqerisht kjo është një shenjë tipike e arrogancës së elitës politike shqiptare…
Nga e di unë që shqiptarët e kuptojnë reformën në drejtësi?! Nga investigimet serioze të shoqërisë civile. Më parë nga USAID dhe tani IDRA, që është kryer në mënyrë profesionale në një numër të madh shqiptarët nga mbarë vendin.
Problemet më të mëdha mbeten tek udhëheqësit e partive politike, prokurorët, gjykatësit dhe doganierët. Nuk habitem aspak nga ky përfundim, se kjo tregon se populli shqiptar e kupton se ç’po ndodh me korrupsionin vendin e tij. Ka ardhur koha që politikanët të fillojnë ta dëgjojnë.” – tha Lu.
Ministri për Çështjet Vendore Bledi Çuçi deklaroi se prezenca e korrupsionit gërryen shoqërinë dhe se reforma në drejtësi do të japë një sërë zgjidhjes në luftën ndaj korrupsionit.
“Prezenca e korrupsionit gërryen shoqërinë. Qasja e qeverisë që në fillim ka qenë e qartë, me një strategji të qartë, me tre shtylla; ndërgjegjësimi, parandalimi dhe frenimi. qeveria shqiptare ka bërë jo pak, sidomos në tendencën për të modernizuar të gjitha shërbimet publike në mënyrë që ti presin rrugën fenomenit. Duhet të jemi të kujdesshëm që mos ta kontaminojmë më shumë siç duhet por perceptimi duhet të afrohet sa më afër realitetit. Sakaq, sondazhi tregon se ka një përmirësim”, tha Çuçi. java/ a.k
