Nga Armando Meta/
Tek dëgjonim dje në Konventën e LSI-së, që nuk la gjë pa nëmur vetëm se kaloi në opozitë, si në një film me xhiro të shpejta, na vinin në mend të gjitha bëmat që partia, e cila ndërroi 3 kryetarë brenda 2 muajve të fundit, ka lënë në memorjen e këtij vendi. Për 8 vite me rradhë LSI ka qenë në krye të axhendës së arrogancës në qeverisje, vendet e punës në administratë që i jepte me përqindje, koncesionet në pikat strategjike të ekonomisë, tenderat, listat e barnave ku gëlojnë biznese të lidhura me partinë, kapje thuajse e të gjitha posteve kyçe në sektorët jetik, kthimi në ‘enukë’ të kryeministrave të cilët nuk arrinin të kërkonin asnjë llogari për postet ministrore që kishte LSI, fushatat elektorale super të shtrenjta, kapërdisjet e zyrtarëve në zyrat e shtetit me makina të shtrenjta e veshje firmato, shpërfillje e të gjithë autoritetit drejtues të institucioneve, ministri që drejtoheshin si çifligje partiake e nuk jepnin hesap gjëkundi, nxjerrje “dhjamë nga pleshti” në mizerjen sociale të shqiptarëve, loja me dy porta në kurriz të interesave strategjike të shqiptarëve etj. etj.
Tek dëgjonim dje të bëhej radioskopia e qeverisë, duke e nëmur që nga themelet deri në majë për dështimet 4 vjeçare të saj, ku ndërkohë për 4 vite pushteti u mjel në këtë bashkëqeverisje si erdhi më përmbarë, i gjithë ky karshillëk na bën të ndihemi nervoz. Situata bëhet paradoksale, pasi ministrat e LSI që janë kapur pas karriges së qeverisë e s’ka burrë nëne t’i lëviz, këmbëngulin të jenë në qeveri, pavarësisht deklamimeve se LSI do jetë tashmë forca e parë…në opozitë.
LSI është përbetuar për integrimin, por mjafton të dëgjoje fjalimet e djeshme ku nuk la baltë pa u hedhur mbi Brukselin për të kuptuar se pushteti vlen më shumë se integrimi. Është e habitshme sepse vetëm LSI i jep të drejtë vetes për të bashkëpunuar për pushtetin sa majtas sa djathtas, e përveç saj këtë nuk duhet ta bëjë asnjë forcë tjetër politike.
LSI duke kaluar në opozitë humbet shumë të mira materiale që burojnë nga pushteti. Humbet tendera, koncesione, punësime në administratë, përqindje për partinë nga pagat e punësimeve. Humbet influenca ekonomike, ministri që s’do mund t’i përdori si çifligje etj., etj. Por ky nuk është kiamti, ndaj duhet marr me qetësi.
Pjesa dërrmuese e shqiptarëve përballen çdo ditë me betejën deri në mbijetesë për shkak të korrupsionit qeveritar nga partitë politike që i qeverisin këto 27 vite dhe sërish e marrin më qetë. Ne kemi një jetë në opozitë me qeverisjet politike e prapë nuk klithim e nuk kërcënojmë, pasi besojmë se vota është instrumenti më i mirë për të përzënë nga qeverisja këdo që e trash zullumin. E për të na ndryshuar mendim nuk mjaftojnë as paratë për të blerë votën. Të gjithë sytë në ballë i kemi. Në opozitë LSI-në e kaluan veset, jo qeverisja.
