Lëvizja Socialiste për Integrim duket se ka bërë një hap përpara sa i përket zgjedhjeve të parakohëshme në Kavajë.
Edhe pse ishte deklaruar më parë se LSI nuk do të merrte pjesë në votimet e 7 majit, burime nga KQZ thonë se partia e Ilir Metës ka regjistruar pranë institucionit të menaxhimit të zgjedhjeve emrin e komisionerit të saj për Kavajën. Pra, LSI ka depozituar ditën e fundit emrin e anëtarit që i takon në KZAZ.
Më herët LSI kishte deklaruar se votimet e Kavajës janë një farsë dhe se nuk kishte pse të merrte pjesë në to ndërkohë që kandidati i takonte Partisë Socialiste për ta propozuar.
Por duket se ky vendim vjen pas darkës së një nate më parë ku Rama dhe Meta kanë diskutuar për të ardhmen e koalicionit. Madje vijimësia edhe për 4 vitet e ardhshme është konfimuar sot nga disa media vendase, ndonëse nuk ka një deklaratë zyrtare nga dy partitë bashkëqeverisëse.
/b.d
