Kreu i grupit parlamentar të LSI Petrit Vasili ka deklaruar se reforma në drejtësi nuk mund të përdoret si një alibi elektorale e mbi të nuk mund të ketë shantazhe.
Në një prononcim për median pranë parlamentit, Vasili tha se pozicioni i LSI për reformën ka qenë i qartë, votim i një drafti me konsensus dhe sipas Venecias. Në emër të LSI, Vasili ka shtuar se ndaj reformës nuk mund të bëhet shantazh e sidomos tentativat për të shtënë në dorë deputetët (akaparuar) janë të patolerueshme.
Vasili ka hequr një paralele mes prestigjit të Crown Agent dhe rezultateve që ajo dha në Shqipëri, duke thënë se mitizimi i ekspertëve nuk është një model i mirë për reformën.
“Së pari lidhur me reformën në drejtësi ne kemi pasur një qëndrim të qartë dhe të pandryshuar që në fillim. Duke pasur në qendër të qëndrimit tonë një plan; plani A. Që do të thotë reformë me konsensus dhe sipas ‘Venecias’. Ky është i pandryshuar.
Gjithashtu ne jemi të qartë dhe lidhur me miratimin e kësaj reformë, duke mbajtur këtë qëndrim dhe duke i shërbyer këtij konsensusi, pasi kjo është reformë solide dhe e bërë në këtë mënyrë. Ndaj është domosdoshmëri për shqiptarët, për vitet që vinë.
Një reformë e tillë mund të realizohet në këtë mënyrë dhe përtej çdo shantazhi dhe çdo lloj tentative për të akaparuar deputetë, pasi kjo reformë nuk mund të konsiderohet si alibi elektorale për zgjedhjet e ardhshme, pasi kjo është një domosdoshmëri për vendin, për 30 vitet që vijnë.
Kemi pasur një qëndrim të qartë se çdo zgjidhje duhet të jetë që respekton vetëm Venecian, sepse është i vetmi autoritet i pranuar në mënyrë gjithpërfshirëse. Një reformë e tillë konsensuale përjashton çdo lloj forme tjetër që është përjashtuar dhe nga reporterët ndërkombëtarë.
Ne e kemi vlerësuar punën e ekspertëve, por Shqipëria është republikë parlamentare dhe jo republikë ekspertësh dhe eksperimente nuk mund të bëhen me Kushtetutën e vendit.
Duhet ta keni të qartë rastin kur ne kemi miratuar një kompani, Crown Agent, që erdhi në doganë dhe rezultatet që erdhën nga ky mitizim i ekpërtëve qenë tepër të hidhura dhe ky model flet qartë dhe për Reformën në Drejtësi.”, tha Vasili./java/a.k
