Mjeku i njohur Tritan Kalo, në një reagim në Facebook, shkruante se ishte i shqetësuar për trokitjen në derë të disa të rinjve nga LSI.
Mjeku shkruante se e shqetësonte fakti që ishin të rinj dhe duhet të formohen profesionalisht, e pastaj të angazhohen në politikë.
Por, vajza për të cilën flet Kalo, është kandidatja e LSI-së për qarkun e Tiranës, Rea Kotani, e cila eshte dhe anetare e senatit te Universitetit te Tiranes dhe studente e fakultetit te ekonomise ne UT.
Ajo ka reaguar duke u shprehur e habitur nga perceptimi që doktori ka pasur për vizitën e saj.
Postimi i plotë i kandidates Kotani:
Në kuadër të fushatës zgjedhore kemi trokitur e shkuar në qindra shtëpi; në shtëpi njerëzish të thjeshtë e me plot halle e vështirësi, në shtëpi të papunësh, por edhe në shtëpi njerëzish të shquar, të përkëdhelurish prej fatit apo edhe në shtëpi njerëzish që nuk e duan LSI-në, por gjithkund, e përsëris gjithkund na kanë pritur si vajzat e tyre; më kanë dëgjuar e më kanë pyetur, edhe më kanë kundërshtuar e kritikuar, por askund nuk ma kanë mbyllur derën. Përkundrazi, më kanë përcjellë me mirësi prindi. Po ju doktor përse jeni ndjerë i tallur?
Ngaqë unë jam një vajzë e re njësoj si tre vajzat e tua që megjithëse jetojnë në Kanada bashkë me nënën e tyre, jam e bindur që e duan vendin e tyre po kaq sa e dua edhe unë që jetoj e shkollohem këtu?
Apo ngaqë unë jam me LSI-në jeni ndjerë ju i tallur? Kjo është një zgjedhje krejt personale dhe unë e kam bërë me bindje dhe punoj për LSI-në me shumë përkushtim, sepse LSI më ka dhënë mua dhe brezit tim shansin për të vendosur vetë e për të përfaqësuar brezin tim!
Unë dhe miqtë e mi të rinj erdhëm tek ju si miq, pa menduar se do të na përgojoje e do të ndjeheshe i tallur! Erdhëm edhe me kënaqësinë që do të takonim një mjek të njohur, që të të mund të të jepnim edhe ndjesinë e respektit për një brez që nuk pranon, madje refuzon të qëndrojë indiferent!
Mikpritja është virtyt, është edhe fisnikëri. Është qytetari! Por ja që nuk qenka e thënë që të jesh mjek, doktor a profesor e domosdo je edhe bartës i këtij virtyti! Ndërsa përgojimi i mikut është poshtërsi, edhe nëse miku është një fëmijë, siç më quani ju! Nejse, punë për ju e gjitha kjo!
Por nuk e di se si do të ndjehen vajzat tuaja që ju, babai i tyre mjek, u ndjetë kaq i tallur pa asnjë të drejtë vetëm e vetëm që unë në shenjë respekti për ju dhe me dëshirën për të takuar doktorin që për të qenë i tillë duhet të ketë vlerë të parë humanizmin, erdha e trokita në derën tuaj?!
/b.d
