Mazhoranca nuk duket e gatshme për një tjetër ndërhyrje në hartën administrative-territoriale siç kërkon Partia Demokratike e cila mbështetet dhe nga partia tjetër e opozitës LSI.
Bledi Çuçi, ish-ministri i pushtetit vendor, aktualisht bashkëkryetari i sapozgjedhur i komisionit të reformës zgjedhore, thotë se ajo reformë ka përfunduar por edhe nëse do të kishte një diskutim ai nuk mund të niste duke përcaktuar kushte për numrin e bashkive.
“Ajo ka përfunduar. Më habit në fakt qëndrimi i LSI pasi ajo ishte aleate me ne dhe reformën territoriale e ka mbajtur si një kartë të suksesit të bashkëqeverisjes”.
Prioritet i komisionit të reformës zgjedhore do të jenë rekomendimet e OSBE/ODIHR që për shkak të bojkotit të opozitës nuk u realizuan nga komisioni pararendës. Por PS duket e hapur dhe për ndryshimin e sistemit, edhe pse Çuçi nuk zbulon cili prej tyre preferohet nga socialistët.
Çuçi thotë se realizimi i votës së emigrantëve është një domosdoshmëri që do të bëhet realitet nga ky komision duke u përfshirë në ligjin elektoral./Klan
