Burime nga Ministria e Financave konfirmojnë se ka pasur shumë ankesa nga qytetarët në lidhje me fituesit e lotarisë së kuponit tatimor. Verifikimi i fituesve të çmimeve të vogla do të vijojë deri më 25 janar, shkruan “Ora News”.
Sipas ministrisë, pasaktësitë kanë ndodhur nga hedhja gabim e të dhënave në sistem nga Posta Shqiptare. Burime zyrtare nga ky dikaster bëjnë të ditur se ankimime ka pasur për ndarjen e çmimeve në kategoritë 3 dhe 4, që u korrespondojnë çmimeve të vogla.
Një Komision i Posaçëm po bën verifikimin e 500 zarfeve të fituesve me çmime të vogla, pasi për 11 fituesit e çmimeve të mëdha nuk ka pasur kontestime dhe sipas Ministrisë së Financave, rezultatet janë certifikuar.
Zyrtarët e ministrisë sqarojnë se nëse gjatë verifikimeve, një fitues rezulton se ka pasaktësi, çmimi do të anulohet për këtë person dhe do t’i kalojë korresponduesit sipas listës së renditur, i cili gjithashtu do të shpallet vetëm pas kryerjes së verifikimit.
Ministria e Financave shpjegon se 11 fituesit e çmimeve të mëdha janë certifikuar një ditë përpara zhvillimit të shorteut të çmimeve të vogla, pasi u kontrolluan 600 zarfe për të përzgjedhur shuma më të mëdha.
Sipas tyre, kjo është edhe arsyeja që kjo pjesë e lotarisë u bë me regjistrim dhe jo në transmetim të drejtpërdrejtë. Ndërsa hedhja e shorteut u bë live. Ministria e Financave deklaron se lotaria e kuponit tatimor do të zhvillohet sërish, pasi qeveria të ketë nxjerrë edhe vendimin përkatës.
